Shillong, Nailar 25 : U Myntri Rangbah ka Jylla Conrad K Sangma ha ka sngi Ba-ar ula pynphai nia kylla ia ka Liang Pyrshah Voice of the People Party (VPP) halor ka kam iada khyndew, haba bthah ia kane ka party kaba synshar ha Khasi Hills Autonomous District Council (KHADC) ban pyniadon bynta lang ia ki Dorbar Shnong ha ka ain Khyndew jong ka.
Haba jubab ia ka jingiatai nia ba lyngkot bala wanrah da u President ka VPP Ardent M Basaiawmoit (Nongkrem), u Conrad ula ong ba ka Sorkar jong u kam ju iaid lait ia ki kyndon bala buh.
“Ka Sorkar ka ju pynneh beit ia ka jingleh ryntih. Kam pat ju don ka khep ba ngin leh da ka bor ha kano kano ka bynta. Kam pat ju don ka khep ba ngi la iaid na ka jingkhang dien na ka bynta ban thied jaka. Baroh la leh kat kum ki kyndon ba iatip lut baroh” ula ong.
U Myntri Rangbah ula ong ba u mynjur bad ki jingkdew u Bah Ardent ba ka jingiasyllok bad ki shnong ki thaw ka long kaba donkam haba shim ia kano kano ka rai ba iadei bad ka khyndew ka shyiap, hynrei u ong ba ia kane ka juh ka nongrim pat la pynkhein da ka KHADC kaba synshar da ka VPP.
Haba kynthoh ia ka KHADC Regulation and Registration of Land (Amendment) Bill, 2026, u Conrad ula ong ba kane ka Bill ka thmu ban weng noh ia ka kyndon ba kongsan bha-kata ban iasyllok bad ki Traditional bodies (Dorbar Shnong, Raid, Hima).
“Ka don ka clause ha ka kyndon 16 kaba ong ba ia ka kyndon 16 jong ka principal act ka kyntien “after prior consultation with respective Dorbar Shnong, Dorbar Raid bad Dorbar Hima, appearing after the word ‘Executive Committee’ shall be deleted” ne “ Hadien ka jingiasyllok bad ki Dorbar Shnong, Dorbar Raid bad Dorbar Hima, hadien ka kyntien “Executive Committee” dei ban pom noh) ula ong.
Haba shim ia kane ka sienjam kum ka kam kaba sngewsih shibun, u Conrad ula ong “Kane ka iaid pyrshah pura ia ka nongrim kaba la pynpaw ha ka jingiatai mynta ka sngi. Ha kawei ka liang ngi ong ba dei ban shim ia ka jingpynsngew ki Dorbar Shnong, katba ha KHADC pat ia kane kajuh ka Act la pynkylla bad weng ia ki Dorbar Shnong, weng ia ki Raid bad kumjuh ruh ia ki Dorbar Hima na ki kam iasyllok ha ka kam iadie iathied jaka”.
Haba buh jingkylli ia ka jingleh hok kane ka sienjam, u Conrad ula ong ba ki Dorbar Shnong, Raid bad Hima ki dei kiba la thaw da ki Kpa Tynmen ba kin long kum ki nongpeit bniah bad tehlakam ia kiei kiei baroh.
“Ki Kpa tynmen ki don ia katei ka jingiohi jngai, ta ka daw ngi don ia ki Rangbah Shnong, ngi don ia ki Raid bad ki Him aba kin pynthikna ia ka jingpeit thuh bad tehlakam ia kiei kiei baroh ha ka rukom synshar khadar tynrai, kaba la iabud da ki phew snem bad spah snem” ula kynthoh.
Haba pynphai kylla ia ka jingdawa sha ka VPP, u Conrad ula ong “Namar kata, nga kwah ban buh ia kane ka jingdawa sha ka VPP. Nga kwah ban buh ia ka mat jingdawa jong nga sha ka KHADC bad bthah ia ki ban sngewbha leh ia kaei kaba phi ialap bad sngewbha pyniadon bynta lang ia ki Dorbar Shnong, Raid bad Hima, sngewbha pynthikna ba ki Shnong ki thaw kim dei ban shah ieh shadien”.
Ula ong ba ka Sorkar ka kyrshan pura ia ka jingiashim bynta lang ki shnong ki thaw ha ki kam jaka puta bad kyntu ia ka KHADC ba kan bat lang ia kane.
 halor ka kam iada khyndew, haba bthah ia kane ka party kaba synshar ha Khasi Hills Autonomous District Council (KHADC) ban pyniadon bynta lang ia ki Dorbar Shnong ha ka ain Khyndew jong ka.){kind=link}