Shillong, Nailar 12 : Ka North Eastern Hill University (NEHU) ha ka sngi Thohdieng kala pynpaw ba kan sa mad ia ki jingeh haba phai sha ka jinglah ban pynrung klas ia ki samla pule jong u snem 2026-2027 lada pynslem ban pyntreikam ia ka National Education Police (NEP)-2020.
“Ka long kaba kongsan ban tip ba ka NEHU, kaba dei ka Central University, ka lah ban mad jingeh haba phai sha ka jinglah ban pynrung klas ia ki samla pule jong u snem 2026-2027 “ ong u PRO ka NEHU Dr Davidson Pyngrope ha ka kyrwoh.
“Ka jingeh kan mih lad aka Sorkar Pdeng ka ai ia ka jingbthah ia ka University ban pynrung klas ia ki samla pule kat kum ki kyndon jong ka National Education Policy (NEP) 2020” ula ong.
Ka kyrwoh ka ong ba ka jingpyllait khubor jong u Vice Chancellor dang shen kala ban jur ia ki jingktah na ka jingslem ban pyntreikam ia ka NEP haba phai sha ka jingiohlad ki samla ka Jylla kiba thmu ban leit rung klas ha kiwei kiwei ki Central University ha u snem 2026.
Nalor kane, ka jinglah jong ka NEHU ban pynrung klas ia ki samla pule jong utei u snem ka lah ban shah ktah da ka jingbthah ban pyniaid ia ki kam pynrung klas kat kum ki kyndon bala pruid dak ha ka NEP 2020.
Kine ki mat ki pynpaw ia ka jingdonkam ban pyntreikam ha ka por kaba dei ia ka Policy ban pynthkikna ba ki jingpynkylla ia ka kam pynrung klas kan iaid beit iaid ryntih na ka bynta ki samla pule ba kwah bteng ia ki jingpule jong ki.
Ka kyrwoh ka ong ruh ba u Vice Chancellor Prof Prabha Shankar Shukla ula pynlong ia ka jingialang bad ki Principal jong ki College bapher bapher ha kaba bun na ki-kumba 90%- na ki Principal kila pynpaw ia ka jingkyrshan ia ka rai jong ka University ban pyntreikam ia ka NEP 2020.
Ka ong ba u VC ula kren shai ba ym pat don satia ki Principal jong ki College ki ban aiktien sha ka University ban pynpaw ia ka jinglong bym pat khreh ha kaban pyntreikam ia ka NEP-2020.
Ka kyrwoh ka pynpaw ruh ba ka University ka iai kut jigmut sha ka jinglah pyntreikam bha ia ka NEP 2020.
