Shillong, Jymmang 10: Ban pynneh pynsha ia kaei kaba ju leh naduh ki por jong ki menbarim menbajah, ka Dorbar Raid Mylliem, Hima Mylliem hynne ka sngi Thohdieng, kala pynithuh ia u Pa’iem Ainam Manik Syiem kum u Syiem ba pura jong ka Hima Mylliem ha ka jingialang kaba la long ha madan Ïew Mylliem Rim.
Ha kane ka jingialang la wan ban iashimbynta lang da u Symbud Myntri Rangbah ka jylla u Bah Prestone Tynsong uba khmih ruh ia ka tnad District Council Affairs, u Chief Executive Member ka KHADC, u Bah Pyniaid Sing Syiem, u Deputy CEM u Bah Pynshngain N Syiem, u Nongialam ka Liang Pyrshah ha KHADC u Bah Titosstarwell Chyne, ki Executive Member bad ki MDC, ki Myntri, ki Bakhraw Batri jongka Hima Mylliem, ki nongialam shnong bad ki bahaiing bahasem jong u Paiem Ainam Manik Syiem.
Haba kren ha ka jingialang, u Paiem Ainam Manik Syiem ula ong, ba ka long kaba kongsan ban pynneh ia ka rukom ai jiat bad dei ban tip shaphang u Thawlang bad ka Iawbei bad ka long kaei kaei kaba ma ban shu shongshit klumar namar kane ka ri kadei kaba tipkur tipkha bad kaba burom ia ki longkñi bad ki Longkur Longjait.
Ula ong, baroh kiba dei ki jait Syiem kam mut ba kidei kiba lah ban long Syiem hynrei ha ka Hima Mylliem dei tang na ki Lai Kpoh kiba lah ban long Syiem bad ula ong ruh, ba ka jinglong Syiem kam dei kaba hiar pateng na u Kpa sha u Khun hynrei kadei kaba hiar pateng na u Kñi sha u Pyrsa kumta ka long kaba kongsan bha ban pynneh ia ka rukom ai jait tynrai.
U Pa’iem Ainam ula ong, ha ka por ba u dang bat kum u Acting Syiem ka Hima Mylliem, ula shem ba kam don ka jingiadei hapdeng ka Hima bad ki nongialam shnong bad bunsien ki nongialam shnong ki wan sha ka Hima tang ha ka por ban ioh ia ka Sanad.
Ula ong, ka long kaba donkam bha ba ka Hima kan don ka jingiadei kaba iajan bha bad ki nongialam shnong, namar khlem ki Dorbar Shnong ka Hima kan ym lah ban leh eiei bad ka bynrap ba ki Dorbar Shnong ki long kiba kongsan bha ban iada ia ka ri lem kumta ha kane ka ri yn wan ban buhai da ki mynder shi sngi.
Na ka liang u Secretary ka Raid Mylliem, u Bah MB Kharlukhi ula ong, ba kane ka jingialang ka dei ka rukom pynithuh ia u Syiem bad kadei kaba la leh naduh ki por jong ki menbarim bad kadei ka niam ka rukom bad kumta kadei ka kamram jong ka Raid ban pynneh pynsah ia ki riti dustur ki menbarim.
Ki nongkren kiba la ai jingkren ha kane ka sngi, kila kitbok kitrwiang ia u Pa’iem Ainam Manik Syiem uba long u Syiem ba pura jong ka Hima Mylliem.
