Shillong, Jymmang 26: Ka samla Riwaka Tangsong jong ka St. Edmund’s Higher Secondary School, kaba la ioh iaka kyrdan kaba 10 haka Higher Secondary School Leaving Certificate (HSSLC) Arts Stream, kala ong ba ka long kaba kongsan ia ki samla pule ba kin pynmlien ban pule kot man la ka sngi bad ka long ruh kum ka jingaibam iaka jabieng.
“Man ba nga ioh por, nga shong bad khreh kot, ki don ki por ba nga sngew jaituh hynrei tang namar ba nga sngew jaituh kam mut pat ba ngan shu shongkai khlem da leh eiei pat. Nga shim ia ki kot jong nga bad ban pule ia ki wat la kadei ba nga pule tang shi sla ne ar sla ruh” ong ka Riwaka.
Kala banjur ba ka jingioh jinghikai hapoh ki kamra skul ka long kaba kongsan bha, nalor jong ka jingkhreh kot hi, kaba kham kongsan tam kadei ban long kiba pynleit jingmut bad kiba shah skhor bha iaki jinghikai kiba ioh na skul.
“Lada ngi shah shkor bha hapoh ki klas, kin don kip or ban gin ym donka mshuh ban khreh ia katei ka mat, namar ba ki nonghikai haba ki ai jinghikai kila da pynkhreh thikna bha ialade. Lada ngi shah shkor bha, ngin ioh pdiang ia ki mat kiba kongsan bad nangne ngi ioh ban pynkhreh iaka jingpule ka jong ngi bad ngim donkam ban pule haban da lah lyndet thik pa thik hynrei kaba donkam ka longban thoh ia ki mat kiba kongsan” la ong kane ka samla pule.
Ka Riwaka kala pynpaw ba ka don iaka jingangnud ban long kum ka IAS Officer bad kala ong ba kan bteng iaka jingpule ka jongka ha St. Edmund’s College, Shillong.
“Ha ka jingim ngi donkam ban iaid suki bad dei kane kaban ialam ia ngi ban poi sha ka thong” ong ka Riwaka haba ai mynsiem ia kiwei pat ki samla pule.
