Shillong Nohprah 03: Ka Martin Luther Christian University ha ka sngi Saitjain kala pynlong ia ka Fete bad ka jingrakhe lypa ia ka Christmas da ka jingthmu ban ioh lum pisa ban ai jingiarap sha ki lanot ha ka jylla Manipur.
La pynlong ia kane ka prokram ha katei ka skulbah kaba don ha Nongrah bad ka jingthmu kaba hakhmat eh ka long ban ioh ai jingiarap ia ki lanot kiba la mad iaka jingeh bad jingjynjar na ka jingmih ka jingiaumsnam hapoh ka jylla Manipur.
Ha katei ka Fete kila don 23 tylli ki dukan kiba kynthup ia ki dukan die ia ki jingbam, ki jait jingialehkai bapher bapher, ka jingdie ia ki jingbuhkai bad ki tiar pynitynnad ha ka por Christmas bad ki jain ki nep.
Ka NEEPCO, Meghalaya Women’s Alliance bad ka Indian Council of Social Welfare, kila wan ban noh synniang da ki tiar iing, ki jain ki nep ia kaba kane ka skulbah kan leit ban sam sha ki lanot kiba sah ha ki Camp ne jaka riehtngen kiba don hapoh ka jylla Manipur.
Ka Kong Patricia Mukhim, kaba dei ka dkhot jongka University Board bad ka Editor jong u Shillong Times kum ka Kongsan, kala ong, ba kala leit ban jurip ia ki Camp jong ki lanot ha Manipur bad kala iohi kumno ki longiing longsem bad ki khynnah kin ym ioh lad satia ban rakhe ha ka rukom kaba dei ia ka sngi Christmas ne ka sngi kaba la kha ia u Jisu Khrist.
Kala ong, ba kane ka prokram kaba la pynlong da ka MLCU bad u synniang uba kala lum kan long kaei kaei kaban ai jingkmen bad jingieid jong ka Christmas sha kitei ki lanot kiba sah ha ki camp.
