Shillong, Iaiong 30: Ki bor pyniaid district jong ka East Khasi Hills, kila pynmih ia ka jingbthah ia ki paitbah ia ka jingwan ka lyiur haba kyntu ba kin long kiba phikir haba jur slap, jur lyer bad ka jinglah ban wan ka jingshlei um.
“Namar ba kan sa wan ka Aiom Lyiur kaba lah ban mih ka jingther u lapbah lapsan, ka jingjur jong ka lyer bad ka jingshlei um, kumta la ai ka jingbthah ia ki paitbah” la pynpaw ka Deputy Commissioner ha ka jingbthah.
La bthah ia ki nongshong shnong ban pynthikna ban buh bha ia ki tiar kiba donkam ki tin, ki mawit, ki jaka bret nuit, ki jingthoh ne sign boards bad kiwei kwiei kiba lah ban shah rah noh ha ka lyer kaba jur.
Ha ka jingbthah la bthah ruh ban long kiba husiar ha kaba iadei bad ki tiar bording.
“Dei ban pynlip ia baroh ki tiar kiba pyndonkam da ka bording, kum ka isteri, mobile charger, ka TV (Television) bad kiwei kwiei lada don ka jingpom pyrthat” kala ong.
Ka Meghalaya kadei kaba la khmih lynti ba kan jur slap bad kumta ka DC kala maham ruh ha kaba iadei bad ka jingma ha kaba iadei bad ki um ki wah.
“La kyntu ia ki paitbah ba kidei ban husiar bad phikir bha ha ka por ba ther u lapbah lapsan namar ba ka lah ban don ka jingshlei um khamtam eh ha ki jaka kiba don hajan ki wahduid bad ki wah”.
“La bthah ia ki paitbah ba kim dei ban leit tur shajan ki um ne ban iaid lyngba ki um kiba tuid bad ban kiar ban leit sha ki wahduid ne wah, ki nala, ki kshaid bad kiwei kiwei, ka jingkhlain bor jong ka um ka lah ban long kaba jylliew bad ka um ka lah ban pynkyllon ia ki kjat bad rah” la ong ha ka jingbthah.
Nalor kane ka la pynpaw ruh, “Ym die ban leit sha ki jaka wahduid, wah ne kshaid”.
Ki nongniah ia ki thuk thuk bad kiba iaid kjat la bthah ba kim dei ban leit sha ki jaka kiba don jingma ha ka por ba don ka jingslap. “Wat nym niah na ki jaka kiba don ka jingshlei um bad ban kiar na ka leit sha ki jaka kiba don ki post elektrik ne ki waiar bording ban lait na ka jingshah lympat ha ka bording elektrik”.
Ha kaba iadei bad kano kano ka jingdonkam jingiarap haba wan lynshop ka bor mariang, ki paitbah ki lah ban phone ha u 112 ban ioh ia ka jingkyrshan haba wan lynshop ka bor mariang.
“La bthah ia ki paitbah ba kin long kiba husiar bad ban shim ia ki lad jingiada ban pynthikna ba ioh ia ka jingshngain ha katei ka por” la pynkut ka jingbthah.
