Shillong, Risaw 10 : Ki Nongmihkhmat ka World Bank, hynne ka sngi Ba-ar, kila pynlut por jan baroh shisngi ban iaid jurip ha kylleng ki jaka sor bad khapsor ka Shillong, ban iohi bad sngewthuh ia ka rukom lum niut bad rukom bret niut jong ki Nongshongshnong ka Nongbah.
Ia kine ki Heh ka World Bank la synran da u Chief Executive Member (CEM) ka Khasi Hills Autonomous District Council (KHADC) Bah Pyniaid Sing Syiem. Kine ki Heh ka World Bank ki kynthup ia u Thierry Martin, Keith Newmaw bad Riddhiman Saha.
Kine ki Nongmihkhmat ka World Bank kila sdang ia ka jingjurip na Wah Umkhrah kaba don hapdeng ka Them Basuk bad ka Madanrting bad kila iohi ruh ba kumno ki nongshongshnong ka thain, kila theh bad pyntuid ia ki niut bad ki jaboh jabain sha wah Umkhen.
Hadien kane, kine ki heh ka World Bank kila leit jurip ia ka shnong Umpling bad ioh iakren ruh bad ki Nongkitkam ka Shnong halor ki kam lum niut bad bret niut da ka Dorbar Shnong.
Kine ki Heh ka World Bank kila leit ruh ban jurip ia ka jaka ha ka shnong Mawlai Mawroh, ka jaka kaba ka KHADC kan shna ia ka Reource Recovery Centre (RRC). Kine ki heh kila iakynduh ruh ia u Rangbah Shnong bad nongkitkam ka Shnong ban iakren halor ki kam ba iadei bad ki niut ba mih na ki thliew Iing ka shnong.
Nangne, kane ka kynhun kala hiar pat sha Marten, ka jaka theh niut ha Mawlai bad iohi dala ki jongki khmat ia ka rukom lum rukom lang bad ka rukom bret ia ki niut ha kane ka jaka.
Haba iakren bad ki nongthoh khubor, u CEM ka KHADC ula pyntip ba ka Executive Committee jong ka Council kan sa shna noh ia ki plan ba iadei bad ka jinglum bad jingbret ia ki niut hapoh u pud u sam ka Council bad ia kane ka plan yn ialeh ban pyndep noh hapoh ka shibnai ban ioh phah sha ka World Bank ba kan ai jingiarap pisa.
Halor ka RRC ha Mawlai Mawroh, u CEM ula ong ba kane ka dei ka pilot project jong ka Council bad kan shong ha ka jingjop jong kane ka project hashuwa ba ka Council kan pyntrei ia ki RRC ha kiwei kiwei ki shnong ki thaw.
Ha kajuh ka por, ka KHADC kala ai khublei ia ki heh ka World Bank kiba la wan iuhkjat ha Jylla bad don ka jingangnud ban sngewthuh ia ka rukom lum bad rukom bret ia ki niut da ki shnong ki thaw ka Nongbah Shillong.
