Guwahati, Iaiong 10: U Myntri kam pohiing ka sorkar pdeng u Amit Shah un pynlong ka jingwan jurip ba arsngi shapoh Arunachal Pradesh naduh mynta ka sngi 10 tarik, kata khyndiat sngi hadien ba ka China ka la jer kyrteng thymmai ia ki 11 tylli ki shnong kiba don hapoh Arunachal Pradesh.
U Shah un pynlong ka jingleit jurip ia ka Kibithoo kaba dei ka shnong kaba kongsan hajan khappud jong u Line of Actual Control (LAC) ha Arunachal Pradesh bad pyllait ia ka skhim ‘Vibrant Villages Programme” (VVP) ka sorkar pdeng kaba thmu ban kyntiew ia ki shnong ha ki thain khappud ka India-China mynta ka 10 bad 11 tarik Iaiong 2023.
Ka VVP ka dei ka jingpynphai jong ka India pyrshah ia ka 628 model ‘xiaokang’ (moderately well-off) ne ki shnong ba la tei da ka China ha ki bynta khappud jong u LAC hapoh China-occupied Tibet (CoT).
Katkum ki khubor ka China ka la sdang ban tei ia kine ki shnong kiba lah ban pyndonkam lang da ki riew paidbah bad ki bor shipai naduh u snem 2017 bad pyndep ia ki ha u snem 2021 ha ka jinglut kaba long haduh T.3.76 lak klur.
Hapoh jong ka VVP, kito ki shnong kiba la shah jied kin ioh ia ka jingpyniasoh lyngba ki lynti surok dewbilat nalor ka jingpynbiang ia ki bording ilektrik, ka jingpyniasoh lyngba ki mobile bad internet connection nalor ha kaba iadei bad ka koit ka khiah bad kiwei pat.
Ka jingthmu ba kongsan jong kane ka long ym tang ban khanglad ia ka jingphet shnong jong ki briew na kine ki thain khappud ba pajih sha ki jaka sor na ka bynta ban wad ia ka jingim kaba kham biang hynrei ban pynphai kylla ia ki briew sha kine ki jaka.
Ka India ka la ithuh ia ki 2,967 tylli ki shnong ha ki 19 tylli ki district ki thain khappud ka Arunachal Pradesh, Sikkim, Uttarakhand, Himachal Pradesh bad Ladakh ia kiba yn kyntiew hapoh jong ka VVP.
