Shillong, Rymphang 17: Kum shi bynta ban pynkhreh iaka ilekshon 2023, ka seng National People’s Party (NPP) Ri Bhoi District hynne ka sngi kala pynlong ka jingiaid paidbah hapoh ka Jirang constituency naka bynta ban pan jingkyrshan iala u kyrtong u bah Sosthenes Sohtun.
Ha kane ka jingiaid paidbah la wan shim bynta ruh da u National Vice President ka National People’s Party (NPP) bad Symbud Mymbud Myntri Rangbah ka jylla bah Prestone Tynsong, bah Sniawbhalang Dhar, MLA ka Jirang konstitwensi u bah Sosthenes Sohtun, MDC u bah Victor Rani lem bad kiwei ki nongialam ka NPP.
Haba kren ha kane ka sngi u bah Sosthenes Sohtun ula ban ba ka Jirang constituency ka dang donkam shi bun ki kam pynroi naka bynta ban kyntiew iaka thain baroh kawei bad ula ong ruh ba ka jinglong MLA ba tang 5 snem kam pat biang ia u ban synshar iaki paidbah watla u la lah ban wanrah ki kam pynroi kaba la kot haduh T.578 klur hapoh san snem ba u long kum u MLA.
U bah Sosthenes ula ong ba ha kine ki san snem ka Jirang kala ioh shibun ki kam pynroi kum ki surok khamtam ka surok na Umdu sha Killing lyngba ka Umsen bad ula iathuh ruh ba ka thain kala kham kiew haka liang ka Pule Puthi bad ka koit ka khiah haka ba la lah ban kyntiew kyrdan ruh iaka Byrnihat PHC sha ka CHC bad la lah ruh ban kyntiew iaka Patharkhmah Civil Sub Division.
“Kum u MLA nga la ialeh katba lah ban pyndep iaki projek kiba ki paidbah ka thain Jirang kila angnud hynrei ki dang don pat kiba kwah pynthoh bria ia nga hynrei ki paidbah kin sa ai ka jubab haka 27 tarik mynta u bnai” la ong u bah Sosthenes.
Naka liang u bah Prestone Tynsong haba kren ha kane ka sngi ula iaroh ia u MLA u ba la lah ban wanrah shibun ki kam pynroi hapoh ka konstitwensi naka bynta ban kyntiew iaki paiudbah bad iaka constituency baroh kawei.
U bah Prestone ula kam ba ka sorkar ba ialam daka NPP ha kine ki san snem kala shim khia bha haka ban kyntiew iaka ioh ka kot ki paidbah bad ka jylla baroh kawei hynrei ki don pat ki briew na kiwei ki sengsain pyrthei kiba kwah ban pynthohbria iaki nongmihkhmat ka NPP daka ba kynnoh ba ki don bynta ha kata ka kynhun High Level.
Ula ong ba kino kino kiba sngew ba ki MLA ki khlem leh eiei naka bynta ki paidbah ne ki constituency ha kine ki san snem ki lah ban ujor syndon daka ejahar.
