Shillong, Nohprah 16: Ka 4th Battalion jongka BSF Meghalaya, hynne ka sngi Saitjaiñ kala pynlong ia ka Civic Action Programme bad ia ka Free Medical Camp ha ïew Dawki bad ha ka Jaliakhola Primary School kiba hap ha East & West Jaintia Hills District.
Ka jingpynlong ia katei ka prokram ka long kum shi bynta ban noh synniang sha ki nongshong shnong kiba sah ha ki thaiñ khappud bad ia kane ka prokram la plied a u K.S. Rana, DIG Sector HQ Jowai bad u Pankaj Soodan, Commandant jongka 4th Bn BSF.
Ha katei ka jingai jingsumar ei, ki doctor jong ki BSF kila khmih bniah ia ki nongpang bad kila sam ei ruh ia ki dawai dashin sha ki paid nongshong shnong jongka Dawki, Bakur Jaliakhola bad Sankhat ha kaba palat 400 kila ioh jingmyntoi.
Kum shi bynta jongka Civic Action Program, la sam ia ki kor computer, ki tiar skul, ki pankha, ki jaka buh um, ki jaka bret niut bad kiwei kiwei kiba shongdor T.6 Lak bad ia kine la sam sha ki khynnah skul bad sha ki longiing kiba dun ha ka ioh ka kot, kiba sah ha kylleng ki shnong kiba don ha ka thaiñ khappud jongka ri India bad ka Bangladesh.
Haba ai jingkren u K.S. Rana DIG Sector HQ Jowai ula ong ba ka jingpynlong ia kum kane ka prokram da ka BSF kala ai jingmyntoi bha ia ki paidbah kiba sah ha ki khappud bad ka BSF kan iai bteng ban ai jingkyrshanbad jingiarap ia ki paidbah.
