Shillong, Jylliew 08 : Ka Iingkashari Meghalaya High Court ha ka sngi Nyngkong, kala pynlong liang mamla lang ia ka National Highway and Infrastructure Development Corporation Ltd (NHIDCL) kum ka nongshah mudui ha ka PIL halor ka jinglong jingman ka surok NH-06 hapdeng ka Jowai bad Ratacherra, bad bthah ia ka NHAI ban aiti ia ka kaiphod ka jinglong jingman ba mynta jong ka surok hapoh ka lai taiew.
Ka Division Bench jong ka Chief Justice Revati Mohite Dere bad Justice W Diengdoh kala pynmih ia kane ka hukum haba shong bishar ia ka PIL bala mudui da u Bah Kynjaimon Amse, uba la khlad noh, pyrshah ia ka NHAI bad kiwei.
Ha ka jingbishar, u nongiasaid ain ka NHAI S Sengupta ula aiti ia ka kaiphod ba thymmai halor ka bynta jong ka surok na Jowaisha Ratacherra kaba long haduh ka 5 tarik Jylliew, 2026, ha ryngkat ki durki dar ba pyni ia ki jingpyndap ia ki tliew bad ka jingshna ia ka kynroh ban tehlakam ia ka jingtwa khyndew.
Ka Iingkashari kala shim bad buh ha ka jingthoh ia kane ka kaiphod.
Ka kam ba iadei bad ki thliew ki syar ha ki katto katne ki bynta bala khmih da ka tnad PWD lah pynsngew ruh da u Amicus Curiae S Panthi ha ka 14 tarik Jymmang.
Ka Iingkashari ha katei ka por kala bthah ia u Additional Advocate General K Khan ban pynthikna ba dei ban pyndap ia ki thliew ha ka surok.
Ha ka sngi Nyngkong, u Khan ula pyntip ha Iingkashari ba ka bynta kaba mih jingkylli ka dei kaba khmih da ka NHIDCL, ym ka PWD bad la kyntu ban phah notice sha ka NHIDCL.
“Namar ki jingpyntip u Khan, la bynrap ia ka NHIDCL kum ka liang mamla No 4. Phah notice sha ka NHIDCL bad ban wanrha biang ia ka kam hadien lai taiew” hukum ka Iingkashari.
Ka Iingkashari kala bthah ruh ia u Amicus ban pyntip ia ka NHIDCL ia ka sngi shong bishar biang khnang ba kan lah ban buh ia u nongiasaid. U Nongiasaid ka NHAI ula pan por lai taiew ban pyndep ia ka jingpyndap khyndew iaki thliew bad ka kynroh, hynrei ka Iingkashari kala ai tang lai taiew bad bthah ia ka NHAI ban ai ia ka kaiphod thymmai ha ka sien shong bishar ban wan.
Ia kane la mukotduma la buh ban bishar biang ha ka 2 tarik Naitung 2026.
 kum ka nongshah mudui ha ka PIL halor ka jinglong jingman ka surok NH-06 hapdeng ka Jowai bad Ratacherra, bad bthah ia ka NHAI ban aiti ia ka kaiphod ka jinglong jingman ba mynta jong ka surok hapoh ka lai taiew.){kind=link}