Agartala, Naitung 27 : Ka TIPRA Women Federation (TWF) jong ka Liang Pyrshah TIPRA Motha Party, kala pynlong ia ka torch rally ba jai jai ha Agartala ha ka janmiet sngi Palei bad dawa ruh ia u Myntri Rangbah ka Manipur N Biren Singh ba un hiar shuki noh namar ka jingbym lah tehlakam ia ka kam iaumsnam ha Manipur.
Kane ka rally ka dei kaba la pynlong halor ka nongrim ban pynrem ia ki jingjia ha Manipur khamtam ia ka jingshah pyniaid lyngkhuit bad shah leh beijot ki arngut ki kynthei kaba la ring video bad pynsaphriang paidbah.
Kane ka rally kala sdang na Vivekananda Maidan bad kala ioh ia ka jingkyrshan na kiba bun ki kynthei bad wat ki shynrang ruh.
Hapdeng ka rally, ki nongiakhih kila dawa ia ka jinghiar shuki u Myntri Rangbah N Biren Singh, haba tynrong ia ka jingkitkhlieh ha u halor ka jingbym lah ban leh eiei halor ki kam iaumsnam kaba la iaid mynta la arbnai shiteng ha Manipur.
Kila buh jingkylli ruh balei ba u Myntri Rangbah Duh ka Ri Narendra Modi u khlemlah ban shim iaka rai ban wanrah pat ia ka jingsuk ha kane ka Jylla.
