Shillong, Risaw 15 : Ka Meghalaya State Rural Livelihood Society, Block Mission Management Unit (BMMU), Mawryngkneng, East Khasi Hills hynne ka sngi saitjain, kala pynlong ia ka ‘SHG Mela’ ha Smit.
Ia kane ka mela ki SHG la pynshongkun da ka jingiadon ryngkat u Myntri kam rep Bah Banteidor Lyngdoh kum u kongsan bad u MLA/MDC ka thain Bah Lambor Malngiang kum u symbud kongsan.
Haba plie ia kane ka mela, u Myntri ula pynpaw ia ka jingkmen ban iohi ia ka jingnang bun ki kynhun ki Kynthei kiba iatreilang ban thaw ia ki SHG, kaba don ia ka bynta kaba khraw bha ban kyntiew ia ka ioh ka kot jong ka imlang sahlang.
U Myntri ula kyntu ia ki SHG ba kin iatylli bad iatrei shitom ba kin nang ioh ia ki jingjop. Ula ong ruh ba ki dei ruh ban pynthoh thikna ia ka song pisa ba ki ioh khnang ban lah pynheh ia ka kam bad ban nang plie lad ia ki dkhot. Ula kyntu ruh ia kiwei ki SHG ki bym pat ioh song jingiarap n aka NRLM ba kin wan shakhmat ban applai khnang ba kin ioh noh.
U Bah Banteidor ula ong ba ka thong jong ka mela ka long ban ai ka rynsan ia ki SHG ba kin pyni iala ka jong ka sap da kaba pyni ia ki mar ba ki pynmih bad ruh ban die ia ki.
Ha kane ka sngi, u kongsan bad u symbud kongsan kila sam ruh ia ki cheque jong ka NRLM sha ki 8 tylli ki Village Organisation bad ki shithi pyllait pisa sha ki 3 tylli ki SHG.
Kiwei pat kiba la iadonlang ki kynthup ia u Bah PT Passah, Project Director ka DRDA. East Khasi Hills, Bah R Kynta COO ka MSRLS nalor kiwei kiwei.
