Shillong, Lber 23: Ka North Eastern Indira Gandhi Regional Institute of Health and Medical Sciences (NEIGRIHMS) kala ai jinghikai ia ka Batch kaba nyngkong jong ki Paramedics bad Doctors kum ki Instructors ha ka National Emergency Life Support (NELS), da ka jingthmu ban kyntiew ia ka rukom ai jingsumar kyrkieh ha kylleng ka Meghalaya bad ka thain Shatei Lam Mihngi.
Kane ka jingai jinghikai kaba 3 sngi, kala sdang ha ka 18 tarik haduh ka 20 tarik u Lber da kaba iatreilang bad ka Jai Prakash Narayan Apex Trauma Centre kaba na AIIMS, New Delhi.
Kila don 27 ngut ki nongiashimbynta kiba kynthup ia ki doctors bad ki paramedics na NEIGRIHMS, Shillong Medical College bad Civil Hospital na Shillong, Jowai, Nongpoh bad Nongstoin kiba la pyndep ia ka jingioh jinghikai ha kaba iadei bad ka Trauma, Cardiac bad ki jingjynjar ban ring ne pynhiar mynsiem.
U Director u Prof Nalin Mehta, uba la lamkhmat ia kane ka prorkam, ula ong ba ka jingiatreilang bad ka JPNATC ka long kaba kongsan ban tei ia ka jingkhlain bad jingtbit ha kaba iadei bad ka jingai jingsumar kyrkieh ha ka thain shatei lammihngi.
Ula bynrap ba ka Institute ka don ia ka jingthmu ban pynlong man la ka por ia kum kine ki jingai jinghikai ha ka thain baroh kawei.
Kane ka rukom ai jinghikai ka pynleit jingmut ha kaban kyntiew ia ka kyrdan kaba iaid ryntih bad ka rukom shim rai kaba kongsan ha ki khyllipmat kiba kongsan tam.
Ki nongiashimbynta kila ioh ban pyntbit ha ka Airway Management, Haemorrhage control bad Resuscitation Scenario da kaba pyndonkam ia ka High‑Fidelity Mannequins, ban pynwandur ia ki bynta jong ka jingai jinghikai khnang ba kin lah ban pyndonkam pat ia ki ha ki jaka trei ki jongki.
“Ngi lah pynkhreh ia ki ba kin treikam kum ki Trainers,” la ong ki nongpyniaid ia kane ka jinghikai. “Na man la kine ki 27 ngut kiba la tbit bad shemphang mynta kin lah ban ai jinghikai kylla ia ki para kiba iatreilang bad ki ban thaw bad kyntiew shuh shuh ha ka jingpynkhreh haba mih kynsan kino kino ki jingjia kiba kyrkieh”.
 kala ai jinghikai ia ka Batch kaba nyngkong jong ki Paramedics bad Doctors kum ki Instructors ha ka National Emergency Life Support (NELS), da ka jingthmu ban kyntiew ia ka rukom ai jingsumar kyrkieh ha kylleng ka Meghalaya bad ka thain Shatei Lam Mihngi.){kind=link}