Nongpoh, Kyllalyngkot 8: Sa shisien ka Nongtluh Eri Farmer Association (NEFA) ha ka sngi Balang, ka la pynlong ia ka tamasa Ri Kunai La Tynrai ha ka wat kaba 6 kum shibynta ban pynneh pynsah ia la ka riti ka dustur bad ki kolshor, ka riam ka beit tynrai, ka bam tynrai bad ka jingkyntiew ia ka kam thaiñ jaiñ ryndia.
Ia kane ka tamasa la pynlong ha madan Umden bad la pynshongkun ia ka da ka jingiadonlang u MLA ka Nongpoh Bah Mayralborn Syiem kum u kongsan ha ka jingiadonlang u MDC Bah Balajied Rani bad kiwei kiwei.
Ka ka jingthmu kaba hakhmat eh jong ka NEFA ban pynlong ia ka tamasa Ri Kunai La Tynrai ka long, ban kyntiew bad ban pynneh pynsah ia la ka riti ka dustur tynrai ha ryngkat ka jingpynsaphriang ia ka khubor halor ka jingriewspah ka thain Umden ha ka kam thain jingthain lyngba ki ksai ryndia ha kaba dang shen ka sorkar jylla ka la ainam ia kane ka thain kum kata ka Eri Silk Village.
Haba kren kum u kongsan, u Bah Mayral Born Syiem u la ai ka jingiaroh bad ka jingpyrto ia ki nongialam ka NEFA ba la lamkhmat da ki longkmie, kiba wat hapdeng ki jingeh ba ki mad hynrei kim shem la kynran dien ban pynlong ia kum kane ka tamasa ban hikai ia ka pateng kaba mynta bad ka ban sa wan kumno ban burom bad ban iai pynneh pynsah ia la ka riti dustur ba la buh naduh ki mynbarim.
U la ong ruh, ba ka long shisha ka jingkmen bad kaba ai mynsiem ia ka thain Umden hi baroh kawei ba hadien ka jingiai buddien ka jingangnud ban ioh noh ia ka jingithuh kaba kyrpang kum kata ka shnong ba pynmih ia u ksai ryndia, ka sorkar jylla ha ka 12 tarik Rymphang 2021 ka la pynbna ia ka thain Umden Diwon kum ka Eri Silk Village kaba long ruh ka jingai mynsiem ia ki nongri khniang ryndia bad ki nongthain ban nang kyntiew ia ka kam thain jain.
Kum u nongmihkhmat ka Nongpoh Konstituensi, u la pynpaw ba un nang treishitom ban buddien na ka sorkar jylla kumno ban pynioh ia ka jingithuh kaba kyrpang na bynta kane ka tamasa Ri Kunai La Tynrai khnang ban ioh ruh ia ki lad jingiarap ban nang pynitynnad bad ban pynphuh pynphieng shuh shuh ia kane ka tamasa ha ki snem kiban sa wan.
