Nongpoh, Risaw 11: Ka Mynken Christian Higher Secondary School, Bhoirymbong kaba dei ruh ka skul kaba la paw hapoh ka jylla lyngba ki kam ialehkai Football bad kumjuh ruh ha ka pule puhti, hynrei kane ka shlem ai jingnang jingstad ka dang don hapdeng ki jingduna ha kaba iadei bad ka Auditorium Hall kumta katei ka shlem kala donkam ban don noh iaka Auditorium Hall khnang ba kan pynsuk iaki khynnah skul ban lait ban shah ia ka sngi bad u slap ha ki por ba don kino kino ki jingialang ne prokram.
Haba phai khmat sha katei ka jingdonkam jong ka skul, ka Managing Committee jong ka Skul kala rai ban sdang ban tei noh ia katei ka hall kaban don ia ka jingheh kaba 95ft la 48ft kaban ngiam kumba 500 ngut ki khynnah skul, ha kaba la sakhi ruh ba ki kam kila sdang ban iaid shakhmat. Hynrei namar ka jingnang donkam ha kaba iadei bad ka pisa ka tyngka ban pyndep ia katei ka hall, ki bor pyniaid skul ki la pynlong da ka “Food Fest Cum Sale of Work” ban pynmih pisa na ka bynta katei ka jingthmu kaba bha jong ka skul, hapoh jong ka phyllaw jong katei Skul bad ha katei ka iew la die ia ki tiar ba la thain bad shna pynwan dur bad pynitynnad hi daki khynnah skul, ki jain ki nep ba la ai sngewbha da ki riew shimet, ka jaka bam ba la ia shet hi da ki khynnah bad ki nonghikai lem bad bun jait ki jingialehkai.
Ia katei ka Iew la wan ban plie ha ka por mynstep da u Director jong ka tnad Pule Puthi u Swapnil Tembe, IAS Director of School Education & Literacy jong ka sorkar jylla ha ka jingiadonlang u Principal ka Mynken Christian Hr. Sec. School, Bhoirymbong u bah Everlasting Pyngrope, ki Dkhot jong ka School Managing Committee, ki Nonghikai lem bad ki khynnah Skul.
U Director jong ka tnad pule puthi ula ai sngewbha da ki juti ialehkai Football bad ki Jersey sha ki khynnah ialehkai Subroto Cup jong ka Mynken kaba long ruh kum ka dak ka jingai khublei bad ka jingkitbok kitwriang ia kitei ki rang ialehkai ha shwa ba ki leit ban iakhun iaka Indo-French Football Tournament kaban sa long ha Paris.
