Shillong, March 2: Ki bor pyniaid District jong ka East Khasi Hills hynne ka Sngi Nyngkong, kila pynlong ia ka “Career Guidance Programme” ban pynkhreh lypa ia ki samla kiban iashimbynta ha ka jingpynrung kam ha ka Agniveer (Indian Army) bad Agniveervayu (Indian Air Force) na ka bynta u snem 2026.
Ia kane ka jingialang kaba la long ha Soso Tham Auditorium, la lumlang ia ki heh ophisar shipai ka ri bad ki bor pyniaid district ban ai ia ki jingtip kiba bniah, halor ki kyndon kiba lah ban aplai ia ka kam, ka jingdon ia ka rynnieng rynniot bad ia ka jingkhlain ha ka met ka phad bad ka jingiaid ki kam ki jam ha ka jingjied lyngba ka Agnipath scheme.
Ia kane ka prokram la ialam da ka Deputy Commissioner ka Kong R.M. Kurbah ryngkat bad u Additional Deputy Commissioner Bah S.Warjri, ia ka jingai jingbatai ia ka rukom pynklhreh la ioh na u Col. Vinay Kumar, Director jongka Army Recruiting Office, u Retired Lt. Colonel u Bah Sebastian Marbaniang uba long u Zila Sainik Welfare Officer bad ki riewshemphang na ka Indian Air Force.
Ka Deputy Commissioner kala kyntu ia ki samla ba kidei ban shim ia kane ka kabu bad ka ong ba ia kine ki rally pynrungkam yn pynlong ha Shillong ban pynthikna ba ki samla na kylleng ki thain kin ioh ia ki lad ban iashimbynta.
Kala pyntip ba ha u snem ba la dep, kila don palat ia ka 700 ngut ki samla kiba la ioh rungkam ha ka Agniveer Scheme bad ha ka BSF bad kane ka long ka dak jong ka jingsakhi ba kala don ka jingkiew ha ka jingsngewtynnad ki samla lyngba ki sienjam kiba la shim lyngba ka career guidance.
U Col. Vinay Kumar ula pynpaw shaphang ka jingpynrung kam ha ka Agniveer 2026 ha ka Indian Army, ha kaba ka jingthep kyrteng kan kut ha ka 1 tarik u Iaiong 2026 bad ka Online Entrance Exam kan long naduh ka 1 tarik haduh ka 15 tarik u Jylliew 2026 bad ula kyntu ia ki samla ka Meghalaya ba kin ialeh ban pyndep ia ka jingthep kyrteng hapoh jong ka por kaba la buh.
Ki nongmihkhmat jongka Indian Air Force kila pynbna ba ka jingpynrung kam ha ka Agniveer Vayu na ka bynta ka thain shatei lammihngi baroh kawei kan long ha ka 20 tarik u Lber 2026 ha ka Headquarters jongka Eastern Air Command.
Ka jingjied ia ki samla kan kynthup ia ka jingbishar ia ka Physical Test bad ia ka Written Examination bad hapoh jongka Agniveervayu Scheme, haduh 25% na ki nongshah thungkam kin shah pynrung syndon kum ki shipai kiba pura bad kane kan shong katkum ka jinglah bad ka jingtbit ka jongki.
Ki heh ophisar kila banjur bad pynshlur ia ki kynthei ba kin mih shakhmat ban iashimbynta ha kane ka jingpynrung kam shipai ka ri bad kila kyrpad ia ki samla kiba la pynrung kyrteng ba kidei ban peit ruh na ka portal jong ka Agnipath ban ioh ia ki jingtip kiba bniah ne ia kino kino ki jingpynbna.
 bad Agniveervayu (Indian Air Force) na ka bynta u snem 2026.){kind=link}