Nongpoh, Nailar 03: Ka Bethany Outreach Hospital, Nongpoh hynne ka step sngi Saitjain ka la pynlong ïaka jingïakop mareh thong kaba 10 kilometre bad kaba 5 kilometre kum ka dak ka jingrakhe ia ka jingdap 10 snem jong ka Hospital.
Kane ka jingiakop mareh kala sdang na Bethany Hospital ter ter ka surok bah bad rung sha ki bynta jong ka shnong Marngar bad pynkut pat dakaba wan phai haduh ha khmat jong ka Bethany Hospital.
Ïa katei ka jingïakop mareh la wan ban kaweh ïaka lama da u MLA ka Nongpoh bah Mayralborn Syiem haka jingïa synran lang u Rangbah Shnong Pahamsyiem Bah Jedwin Lyngdoh lem bad kiwei kiwei ki Doctor naka Bethany Hospital.
Ha katei ka jingïakop mareh la wan ban ïashimbynta lang da ki arngut ki Longkmie kata ka kong Kmoin Wahlang bad ka kong Darishisha Ïangjuh, ki snar mareh jong ka jylla kiba la long ruh kum ki nongrah ktien (Race Ambassador) jong katei ka jingïakop mareh.
Da ki spah ngut ki ba ju sngewtynnad ban mareh kynthup naduh ki khun samla bad ki ba la heh ha ka rta, kila wan ban iashimbynta ha kane ka jingiakop mareh.
Ki nongjop ha katei ka jingiakop mareh jong ka 10 kilometre haka rta kaba 18 haduh 35 snem jong ki shynrang la ioh ban rah da u samla Monas Bongrung bad napdeng ki kynthei la ioh rah daka samla Filinza Hensepi.
Haka rta kaba 36 haduh 45 snem jong ki shynrang la rah da u bah Jomingstar Ramsiej bad naki kynthei la rah da ka kong Ibapaleishisha Nongkseh.
Haka kaba 46 haduh 55 snem jong ki shynrang la rah da u bah Badonsingh Tham bad naki kynthei la rah daka kong Snora Lyngkhoi bad haka rta kaba 55 snem shajrong naki shynrang la rah da u bah Swonding Mawlong bad naki kynthei la rah da ka kong Snora Rani.
Haka jingïakhun kaba 5 kilometre haka rta kaba 18 haduh 35 snem naki shynrang la rah da u samla Shemlang Suba bad naki kynthei la rah daka samla Rosa maslai.
Hala rta kaba 36 haduh 45 snem jong ki kynthei la rah da ka kong Phimly Pamshong.Haka rta kaba 46 haduh 55 snem jong ki shynrang la rah da u bah Arund Basaïawmoit bad naki kynthei la rah da ka kong Silaka Kleiñ.
Haka rta kaba 55 snem sha jrong jong ki shynrang pat la rah da u bah Banteiskhem Khongwir.
Naka liang ki bor pynïaid jong katei ka jingïakop mareh ki la sam daki Takma bad ki Syrnod sha baroh ki nongjop ha ryngkat ka song pisa kaba 10,000/-, 8,000/- bad 5,000/- haka jingïakop kaba 10 kilometre bad 8,000/, 5000/- bad 3,000/- haka jingkop kaba 5 kilometre.
