Shillong, Rymphang 17: Ka Tnad Sports & Youth Affairs jong ka jylla hynne ka sngi Saitjaiñ kala pynlong ia ki prokram bapher ha ka nongbah Shillong ban kyntiew bad ban pynshongshit na ka bynta ban pynlong ia ka Khelo India University Games kaba 4.
La sdang ia kane da kaba pynlong ia ka prokram da ka “Starting Point – Kyndailad ” ha kaba la kaweh ia ka lama ban sdang ia ka Bike Rally bad ka jingshad da u paid kaba la ai kyrteng “Flash mob.”
Ka Deputy Commissioner jong ka East Khasi Hills District, ka Kong R.M Kurbah, kala kaweh ia ka lama ban pynsdang ia ka Bike Rally bad kala iashimbynta lang bad ka Flash Mob ha ryngkat bad kiwei kiwei ki heh ki haiñ.
Haba kren ha ka jingialang paidbah ha Kyndailad, ka Kong R.M Kurbah kala pynpaw iaka jingsngewkmen ia ka jingwan iashimbynta bun ngut bad palat 500 ngut ki nongiashimbynta kin iashimbynta ha katei ka Games kaban wan.
Kala banjur ba ka Khelo India University Games kan long kum ka atiar kaba khlain kaban ai mynsiem ia ki samla ban pynleit jingmut bha ialade ha ki kam ialehkai.
Ka Kong Kurbah kala pynpaw ruh iaka jingdon jingiadei hapdeng ka pule puthi bad ka kam ialehkai bad kine baroh ar kin hap ban ia iaidlang na ka bynta ban kyntiew iaka bha ka miat shimet.
Ia kane ka Bike Rally bad ka Flash Mob la pynkut ha Ward’s Lake bad kala don ruh ka jingtem jingput na ka Meghalaya Grassroot Music Project.
