Shillong Nailar 11: Ka Shillong Lajong FC hynne ka sngi Saitjaiñ kala jam shaphrang ban khur ia ka jingjop hadien ba kala pynrem noh ia ka Rangdajied United FC ha ka jingiakhun ia ka Durand Cup kaba la long ha JN Stadium Shillong.
Ki rangialehkai shadien ka Shillong Lajong kiba kynthup ia u Ronney Willson bad u Kenstar Kharshong kila pynthikna ia ka Shillong Lajong FC ban jop pyrshah ia ka Rangdajied United FC bad da kane ka jingjop, ka Shillong Lajong kala kiew sha ka kyrdan ba hakhmat eh da kaba kamai 6 point bad ka FC Goa hynrei ka ka Shillong Lajong kala tam ha ka jingïapher kol.
U Jose Hevia ula wanrah tang kawei ka jingkylla ha ka thup ïalehkai jong ka Shillong Lajong ha kaba u nongap kol u Neithovilie Chalieu ula mih ha ka jaka jong u Manas Dubey, katba u Coach ka Rangdajied United u Ainbanjop Shadap ym shim la pynkylla ia ka kynhun ialehkai bad pynneh kumjuh kumba la iakhun pyrshah ïa ka FC Goa kaba la long ha nongbah Shillong.
Naduh kaba sdang kane ka jingiakhun haduh kaba kut, kine ki ar kynhun kila ialehkai bha bad ka jingialehkai kala long kaba sted bad itynnad.
Ka Shillong Lajong kala ioh ban thep kol ha ka kylla step ha kaba u Kenstar ula thep ia ka kol kaba la shut da u Ronney Wilson lyngba ka Free Kick, hynrei ka Rangdajied kala ioh iaka kabu ban thep kol lyngba ka Penalty hynrei u Treimiki Lamurong ym shim la lah ban thep ia ka kol.
Mar ia sdang 4 minit ka jingiakhun ha ja kylla miet, ka Shillong Lajong kala ioh thep ia ka kol ka baar, lyngba u Kenstar Kharshong bad nangne ka Lajong kala bteng ban synshar ia ka jingiakhun ha kaba kala pynlong ia ki rangialehkai shadien ka Rangdajied ban pynskhem bad ban tehlakam ia ki rangialehkai ka Shillong Lajong ba kin ym iohlad ban thep kol shuh.
U Phrangki Buam ula ioh ia ka lad ban thep ia ka hat-trick hynrei kane kala shah pynpulom noh na ka jingiada u nongapkol ka Rangdajied bad kala don ruh ka jingshut sharud ia ka bol ia kaba kam shym la leit shapoh kol.
