Shillong, Iaiong 24: U Myntri Rangbah ka jylla u Conrad K. Sangma ula pynbna ba ka sorkar kan pynleit jingmut ha kaban kyntiew ia ka jingkhlain kyrpang jong ki shnong kaba kynthup ia u shynrai Lakadong bad ki jingshna tynrai, ban kyntiew ia ka kam jngohkai bad ia ka roi ka par ha ki thain nongkyndong. Kane ka jingbthah kala mih hadien ba la dep lum ia ka jingialang kaba la pyniaid da u Myntri ka Sorkar Pdeng uba khmih ia ka Development of North Eastern Region (DoNER) u Jyotiraditya M. Scindia.
Haba batai khyndiat shaphang katei ka jingialang ha ka rynsan Social Media, u Conrad Sangma ula ong, “Da kaba iaid ryngkat bad ki jingai jingmut jong u Myntri ka Sorkar Pdeng, ngi ngin sa nang kyntiew ia ka jingkhlain kum ia u shynrai Lakadong bad ban pyniar ia ki jingshna tynrai sha ki Homestay bad ki jaka jngohkai. Ngi iengskhem ban kyntiew ia ki jingtei ha ki thain nongkyndong ban pynbiang ia ki surok ha ka leit ka wan ban kyntiew ia ka kam jngohkai bad ban kyntiew kyllum ia ka ioh ka kot”.
Kane ka jingialang kadei shi bynta jong ka jingkhmih bniah halor ka Meghalaya State Vision Plan, ha kaba u Myntri Rangbah ula pyni ia ka ‘Roadmap’ kaba iaid bad ka jingangnud jong ka jylla ban kynjoh ka ioh ka kot sha ka $10 billion. Ula pynpaw ruh ia ki mat kiba kongsan kiba iadei bad ka rep ka riang, Food Processing, kam jngohkai, jingseng kam lajong bad ka jingpynsuk ia ka leit ka wan kum ki mat kiba kongsan.
Ka Development of North Eastern Region (DoNER) kala pynthikna ia ka jingpynlong ia katei ka jingialang lyngba ka rynsan social media ka jongka da kaba ong, “U Jyotiraditya M. Scindia ula lum ia ka jingialang bad u Myntri Rangbah ka Meghalaya u Conrad K. Sangma, ki heh ophisar ka sorkar Meghalaya bad ka kynhun jongka Ministry of Development of North Eastern Region, ban khmih ia ka jingpyniaid ia ki projek kam pynroi. Ula khmih ia ka rukom pyntreikam ia ki projek bad banjur ia ka jingkongsan ban pynneh pynsah ia ka jinglong jingman ki sawdong sawkun jong ka mariang bad ia ka kam jngohkai ban plie ia ki jinglah bad ia ka jingkhlain bor pura jong ka jylla Meghalaya”.
Ka jingbanjur halor u shynrai Lakadong uba dei uba khlain ha ka rong ka rup bad ban pynneh pynsah ia ki rukom shna tynrai kala pyni ia ka jingiaid kaba la pynwandur bha ban kyntiew ia ka kam jngohkai ha ryngkat bad ka jingkyntiew lang ia ka kolshor tynrai bad ia ka rukom im.
Ka jingthmu ban pynbiang ia ka leit ka wan ha ki thain nongkyndong bad ia ki jingtei bapher, kadei kaba la khmih lynti ym tang ba kan khring ia ki briew kiba nabar hynrei kan thaw ruh ia ki kabu kiban neh ha ka kamai kajih ha kylleng ki jaka bad ki shnong kiba rit jong ka jylla Meghalaya.
 u Jyotiraditya M. Scindia.){kind=link}