Shillong, Lber 16: U Lat ka jylla CH Vijayashankar ha ka sngi nyngkong, ula pyllait ia ka State Focus Paper 2026-27 ha ka Credit Seminar kaba la pynlong da ka National Bank for Agriculture and Rural Development (NABARD), Meghalaya Regional Office.
Kane ka State Focus Paper kadei ka kot kaba kongsan kaba khmih bniah ia ka jinglah bor ban shimram ia ka pisa ne credit potential ha ka liang ka rep ka riang ne kiwei pat ki bynta, ki karkhana rit bad kiwei ki tnad kiba kongsan ha ka jylla. U Lat ula aiti ruh ia ki jingthoh sha ki kynhun kiba lah ban pyntreikam ia ki projek bapher bapher.
Haba ai jingkren u Lat ula ai jingiaroh ia ka NABARD kaba la pynlong ia kane ka seminar man la ka snem.
Ula ong, ba ka Seminar kan wanrah lang ia baroh ki briew kiba donbynta ha ka kam na ka liang ka sorkar, ki bank bad ki kynhun kiba kyntiew ia ka roi ka par ban iatai ha kaban pynkhlain ia ka jingioh ia ka pisa ka tyngka ha ki tnad kiba kongsan bad ban kyntiew ia ka roi ka par ha ki thain nongkyndong. Ula pynpaw ia ka jingkyrmen ba ka State Focus Paper kan ai iaki jingtip kiba kordor bad ia ki jingtip kiba lah ban leh ban btin ia ki kynhun bei tyngka bad ki nongthaw polisi ha kaban kyrshan ia ka jingkiew ka ioh ka kot ha ka ki thain nongkyndong jongka jylla Meghalaya.
U Lat ula pyntip ba ka rep ka riang kala iai bteng ban long u budlum jong ka ioh ka kot ka Meghalaya. Kiba bun na ki nongshong shnong kidei kiba shaniah ha ka rep ka riang bad kiwei kiwei ki kam na ka bynta ban kamai jakpoh.
Haba banjur halor ka jingiohi jngai jongka Viksit Bharat @2047, ula pynpaw ba ka jingpynkhlain ia ka rep ka riang, ka jingpynbha ia ka jingioh ia ka pisa pilain bad ban pynkupbor ia ki nongrep kiba rit ka long kaba kongsan na ka bynta ka jingkyntiew kaba salonsar bad kaba iai neh.
U Lat ula banjur ia ka jingdonkam ban pynthikna ba ki jingdon jingem kiba riewspah jong ka thain shatei lammihngi dei ban pyndonkam da ka lynti katkum ka jingstad saian bad ha ka lynti ban pynneh pynsah ia ka jinglong jingman jong ka sawdong sawkun jong ka mariang. Ula pynshlur ba dei ban rep ban riang khlem da ai dawai, ia kaba ka Meghalaya ka long kaba lah ban kiew bha shaphrang.
Haba kren shaphang ka rukom treikam jong ki bank bad ki kynhun bei tyngka, u Lat ula iawer ban don ia ka jingiatreilang hapdeng ki tnad sorkar, bank bad kiwei kiwei ki kynhun. Ka long kaba donkam ban pynthikna ba ka jingmyntoi na ki scheme bapher bapher bad ki prokram kan poi ryntih sha ki nongrep bad ki nongsengkam ha ki thain nongkyndong.
U Lat ula pynpaw ruh ia ka jingdonkam ban kyntiew ia ki karkhana kiba rit, ban pynkhlain ia ki kynhun Cooperative bad ban pynkup bor ia ki longkmie lyngba ki Self Help Groups.
La pynkut ia kane ka seminar da ka jingiatai hapdeng kiba donbynta lang ha ka kam na ka bynta ban pynkhlain ia ka jinglah ban ioh ia ka pisa bad ban kyntiew ia ka ioh ka kot ha ka jylla.
Ha kane ka jingialang la wan ban iadonlang u H.C.Chaudhary, IFS, Principal Secretary to the Governor, Joan R Blah, General Manager, NABARD, u Swapnil Tembe, Secretary ka Department of Finance, ki nongmihkhmat na ka Reserve Bank of India, State Bank of India, ki heh ophisar ka sorkar Meghalaya bad kiwei kiwei.
, Meghalaya Regional Office.){kind=link}