Mangsang, March 5: U Myntri Rangbah ka jylla u Conrad K. Sangma hynne ka sngi Palei, ula buh ia u mawnongrim ban tei ia ka Mini Stadium bad ban shna pynbha ia ka Mangsang Primary Health Centre (PHC) ha East Garo Hills, da ka jingthmu ban pynkhlain ia ka kam ialehkai bad ia ki jingtei ha kaba iadei bad ka koit ka khiah ha kane ka thain.
Ia ka projek ban shna ia ka Mini Stadium la mang ban shna ha ka jinglut kaba kot T.4.73 Klur ia kaba yn pyntreikam da ka Department of Sports and Youth Affairs bad yn kyntiew noh ia kane ka jaka ialehkai kaba la don lypa kaba la tei da u
(L) P. A. Sangma.
Haba kren ha ka jingialang, u Sangma ula pynkynmaw ia ka jingdon ia ka jingiadei kaba lah slem bha bad kane ka thain bad kumjuh ruh na ka liang u nongialam uba la khlad noh ruh ula don ia ka jingiadei kaba iajan bha bad ka
Mangsang.
“Nga don ia ki jingkynmaw ia ki por kiba sngewtynnad halor kane ka madan kaba ngi shong mynta. U (L) PA Sangma u don ia ka jingieid kaba kham pher na ka bynta ka Mangsang bad u ju kren barabor shaphang kane ka jaka bad ia ki paitbah” ula ong.
U Myntri Rangbah ula ong, ba ka jingbuh ia une u mawnongrim kadei ruh ha ka lyngkhuh jong ka jingdap 10 snem ka jingkhlad noh jong u PA Sangma bad kumta ka long kaba iahap bha kum ka jingkynmaw burom ia u Speaker barim jongka Lok Sabha uba la noh synniang bha na ka bynta ka roi ka par jong kane ka thain.
Ha kane ka prokram, u Sangma ula buh ruh ia u mawnongrim ban shna pynbha bad ban pynheh ia ka Mangsang PHC, ha ka jinglut kaba kot T.2.98 Klur. Kane ka jingkyntiew kan kynthup ia ka jingshna pynbha ia ka jaka ai jingsumar, ka jingshna ia ka Staff Quarter, ka GNM Quarter bad ka Yoga ryngkat ka Meeting Hall ban pynbha ia ka jingai jingshakri ha ka koit ka khiah ha kane ka thain.
Haba banjur ia ka jingkongsan ia ka koit ka khiah ha ki shnong ki thaw, u Myntri Rangbah ula ong ba ka jingpynkhlain ia ki jaka ai jingsumar kadei ka mat kaba ka sorkar jylla kala buh hakhmat eh.
U Sangma ula pynbna ruh ia ki katto katne ki kam pynroi na ka bynta kane ka thain. Ula ong, ba shen yn sa pyntreikam noh ia ka Fire and Emergency Services ha kane ka thain bad ia ka jingtyrwa ban thaw ia ka Administrative Block kaba thymmai kadei kaba yn hap ban khmih bniah shwa.
Nalor kane, ula pynbna ba ia ka surok Mangsang–Adokgre shen kan sa jam noh sha ka wat ka baar kaban pynbha shuh shuh ia ka jingpyniasoh bad ka Shillong bad Guwahati, ia mynta hi ka dang don hapdeng jong ka jingleh ia ka survey.
Ula pynshlur ia ki samla ba kin pyndonkam thikna ia ki skhim sorkar bad u Myntri Rangbah ula kyntu ia ki ba kidei ban wad ia ki lad bad ia ki kabu ha kaban seng kam lajong bad ban kyntiew ia ka sap ka phong bad ka banjur ia ka jingkongsan ban pynneh ia ka jingkhuid jingsuba ha ka shnong ka thaw.
Ha kane ka prokram la wan ban iashimbynta da u Jim M. Sangma, ki heh ophisar sorkar bad ki nongshong shnong.
 ha East Garo Hills, da ka jingthmu ban pynkhlain ia ka kam ialehkai bad ia ki jingtei ha kaba iadei bad ka koit ka khiah ha kane ka thain.){kind=link}