Shillong, Rymphang 27: U Myntri Rangbah ka Jylla Conrad K. Sangma ha ka sngi Thohdieng, ula pyllait paidbah ia ki 84 tylli ki bos thymmai kiba kynthup lang ia ki 55 tylli ki bos elektrik jong ka PM eBus Sewa Scheme, ha ka jingialang kaba long ha Meghalaya Legislative Assembly bathymmai ka jylla.
Kane ka jingpyllait paidbah kadei ruh ka jingsdang pyntreikam ia “Ka Bos Jong Ngi” hapoh jong ka Tnad Urban Affairs.
Kine ki bos ba thymmai kidei kiba la pyndiat ia ki Air-Conditioning, jaka ban charge ia ki mobile phone, ka Real Time Tracking System bad ka e-ticketing ban pynthikna ia ka jingsuk, jingshngain bad ka jingbit jingbiang jong ki nongshong bos.
La sdang pyniaid ia kine ki bos hynne ka sngi na IIM Shillong sha Upper Shillong, bad kane ka jingshakri kan long man la ka sngi naduh ka por 7 baje mynstep haduh 9 baje mynmiet. Kane ka jingthmu kadei kaba la khmih lynti ban pynbha iaka leit ka wan bad ban pynbiang ia ki nongshong shnong ia ka jingshaniah, ka jingaram bad kaba iadei bad ka mariang ha ka leit ka wan ka jongki.
Ha kane ka prokram la kynthup ruh ia ka jingaiti ia ki 7 tylli ki Food Cart ne ki kali ban die jingbam, sha ki nongioh jingmyntoi lyngba ka Van Dhan Vikas Kendra (VDVK). U Myntri Rangbah ula aiti ia kine ki Food Cart sha ki nongioh jingmyntoi kum ka jingkyrshan ia ka kamai kajih ka jongki bad ia ka jingsengkam ha ki shnong ki thaw.
Kane ka jingsdang ka pyni ia u mawmer uba kongsan ha ka jingpyrshang ka sorkar ban pynbiang ia ka leit ka wan ki paitbah katkum ka jingiaid ka juk kaba mynta, ban thaw ia ki lad kamai kajih bad ban kyntiew ia ki kam pynroi ha sor.
