Shillong, Nailar 15 : U Myntri Rangbah ka Jylla Meghalaya Conrad K. Sangma ha ka sngi Thohdieng u la pynlait paidbah ia ka Chief Minister E-Championship Challenge, ka jingwad ha baroh kawei ka jylla ia ki nongseng kam seng jam kiba lah ban pynheh ia ki kam ba ki trei na la jong, ban tem ia ki jingeh kiba mih bad ban pynkylla ia ka ioh ka kot ka Jylla.
Ka jingiakop bala pynlong hapoh PRIME (Promotion and Incubation of Market-driven Enterprises) initiative, ka jingïakhun kan jied ïa ki 75 ngut ki nongseng kam na ka kynhun ba nyngkong jong ki 150 ngut ki nongaplai hadien ka jingbishar jong ki stad ki jhad ha ki kam karkhana, ki nongsengkam kiba jop, ki heh sorkar bad ki stad ki jhad ha ka kam pule dangle.
Ki nongseng kam seng jam ba sha jied kin rung ha ka prokram ai jinghikai pyntbit ka PRIME kaba hynniew bnai, ban ïoh ïa ka jinghikai na ki riewshemphang, ka jingïoh jingkyrshan pisa, ki lad jingïarap ha ka kam, bad ka jingpaw ha ka kyrdan jong ka ri.
Ki 35 tylli ki startup kiba pawnam kin ioh T.2 lak kum ka jingai jingiarap na ka bynta ki kam, katba ki 40 tylli kiba hadien kin ioh mar T. 1 lak. Ki nongiashim bynta kin ioh ruh ia ka jingmyntoi na ki jinghikai lyngba ki bootcamp, ka jingai jinghikai ba shimet shimet na ki riewshemphang, ki jaka treilang ha Shillong, Tura, bad Nongpoh, ki jingpyniasoh bad ki iew ki hat, ka jingkyrshan ia ki jingaikyrteng ia ki mar bad ki jingpyniasoh bad ki nongbei tyngka.
Nalor kata, ki kam ba dang sdang ki bym shym la jied na ka bynta ka jingpynmih pura ia ki mar kin ioh ia ka jingkyrshan ban pynskhem ia ki kam ba ki trei. Ki nongjop kin ioh ia ki syrnot ba la ai lang da ka sorkar Meghalaya bad ka IIM Calcutta Innovation Park.
Ka jingaplai na ka bynta ka E-Championship Challenge 6.0 kan kut noh ha ka 15 tarik u Nailur, 2025
U Conrad Sangma haba ai jingkren ha ka sngi rakhe ia ka I-Day, u la kren halor ka jingpyrshang jong ka sorkar ban pynkup bor ia ki samla lyngba ka jingseng kam seng jam.
“Kum ka jubab, ngi la sdang ïa ka prokram PRIME, lyngba jong ka ngi la seng ïa ki incubation centre, pynlong ïa ki jinghikai treikam, pynïasoh ïa ki nongsengkam bad ki nongbei tyngka, bad kiwei kiwei.
