Shillong, Naitung 28 : Ki nongshong dukan madan na Polo bad Jail Road, kila plie ia ki dukan die mar jong ki na ka jaka shong dukan madan ba thymmai ha Shillong, kum shibynta jong ka jingpyrshang ka Jylla ban pynkynriah ia ki dukan madan hapoh ka Meghalaya Street Vendors Scheme 2023.
Ka Tnad Urban Affairs ka pyntip ba ki nongshong dukan madan kiba ju shong dukan ha Jail Road la pynkynriah noh sha ka jaka pynieng kali ba don pyrshah ka SBI, katba kiba na Polo la pynkynriah sha jaka shong dukan madan hajan ka Matri Mandir.
Na ki 132 tylli ki dukan ha Matri Mandir, 70 tylli ki dei kiba la shong briew. Ha jaka pynieng kali pyrshah ka SBI, 9 na ki 79 tylli ki dukan la shong. Sa 22 ngut ki nongshong dukan madan na Secretariat Hills bad IGP Juncton yn sa pynkynriah ha ka 29 tarik Naitung.
Ka Tnad ka pyntip ba ia kane ka kam la pyndep lyngba ka jingiasyllok bad khlem kano kano ka jing leh da ka bor.
Ban kyrshan ia ki nongdie dukan madan, ka Sorkar kan ai T.20,000 ka song jingiarap ia ki nongdie dukan madan ba kynriah, kiba don ia ka Certificate of Vending hapoh ka Chief Minister’s Urban Livelihood Grant.
Ka kynthup ia T.10,000 ban siew noh bad T.2,000 manla u bnai na ka bynta san bnai.
Haduh mynta, 65 tylli ki CoV lah dep ban ai hapoh ka SBI Zone bad 106 tylli ha Matri Mandir.
Ka Tnad ka pyntip ruh ba ka jingpynkynriah ia ki dukan madan ha Laitumkhrah ban sdang naduh ka 17 tarik Nailar.
