Shillong Kyllalyngkot 30: Ka Khasi Hills Autonomous District Council (KHADC) kala rai ban pynkynriah noh ia ka tarik ban pynlong ia ka Monolith Festival na ka 1 tarik u Rymphang sha ka 22 tarik u Rymphang ha Khasi Heritage Village, Mawphlang.
Ia kane la pyntip da u Deputy CEM ka KHADC u Bah Pynshngain N Syiem, hynne ka sngi Baar.
U Bah PN Syiem ula ong ba ka Council kala pynsangeh noh shwa ban pynlong iaka Monolith Festival kaba la buh ban long ha ka 1 tarik haduh 3 tarik hynrei ia kane ka tamasa yn pynlong noh ha ka 22, 23 bad 24 tarik u Rymphang mynta u snem.
“Ka daw ba ngi la pynkynriah ia ka tamasa kadei namar ka jingwan ba dang shen jong ka President ha Mawphlang kaba la pynbunkam ha ka jingpynkhreh iaka jingwan ka jongka bad ha kajuh ka por namar ka jingkhriat palat ka bneng” ong u u Bah PN Syiem.
Ula iathuh, ba ka Council kala dep ruh ban iapynbeit ba ia ka tamasa yn wan ban plie da u Symbud Myntri Rangbah ka jylla u Bah Prestone Tynsong ha ka 22 tarik bad yn pynhap pyrda pat ia kane ka tamasa da u Myntri Rangbah ka jylla u Conrad K Sangma ha ka 24 tarik u Rymphang.
U Bah PN Syiem ula ong ba Monolith Festival mynta ka kynti kam kham pher khyndiat namar ba kadei kaba la iatreilang hapdeng ka KHADC bad ka Tnad Tourism jong ka jylla bad ka Meghalayan Age Limited bad la thung ruh ia ka kynhun Rocski kum ki nongpyniaid ne ki Event Management jong katei ka tamasa.
Ula iathuh ruh ba kiba bun ki jingpynkhreh pynkhrum ban pynlong ia ka tamasa lah dep ban pynbiang lut kiba kynthup ia ki Traditional Hut, Ampitheatre, Green Room, ka VIP Gallery, ka Museum bad kaba sah mynta kadei sa tang ki kam kiba rit baria bad ka Rocski ka hap ban shna sa tang ia ki Stall ne ki jaka ban die jingdie.
