Aizawl, Nohprah 01 : Ka Election Commission ka Ri India (ECI) kala pynkynriah ia ka tarik niew vote jong ka elekshon MLA ha Mizoram n aka 3 tarik (Sngi U Blei) sha ka 4 tarik kaba dei ka sngi Nyngkong.
Ka ECI kala shim ia kane ka rai hadien ba bun ki kynhun na Mizoram kila dawa ban pynkynriah ia ka Tarik namar ka 3 tarik bala buh ka hap ha ka sngi U Blei kaba dei ka sngi kyntang jong ki paid nongshongshnong ka Mizoram, kiba dei ki Khristan.
Ka jingiathep vote ban jied ia ki 40 ngut ki MLA ba thymmai sha ka Mizoram Legislative Assembly kala long ha ka 7 tarik u Naiwieng 2023. Hynrei ia ka sngi niew vote ka buh ha ka 3 tarik kaba dei ka sngi U Blei, kaba dei ruh ka sngi ban niew vote ha ki saw tylli kiwei pat ki Jylla kata ha Chhattisgarh, Madhya Pradesh, Rajasthan bad Telangana.
“Ka Commission kala mynjur ia ki jingdawa jong ki kynhun bapher bapher bad rai ban pynkylla noh ia ka Tarik ban niew ia ki vote na ka 3 tarik Nohprah sha ka 4 tarik Nohprah kaba hap noh ha ka sngi Nyngkong” ong ka ECI ha ka kyrwoh bala pyllait hynne ka sngi Thohdieng.
