Shillong Naitung 15: Halor ka jingthmu jong ka sorkar jylla ban pynkynriah noh ia ki nongdie madan na ka thain Khyndailad, u Myntri ka Sorkar Jylla Bah AL Hek ula ban jur ba baroh ki don ia ka hok ban im bad ban kamai jakpoh.
“Baroh ki don ia ka hok ban im. Kidei ban tip pat ia ka jaka ka jongki” ong u Bah Hek haba iakren bad ki nongthoh khubor.
Da kaba kyntait ban kren eiei than halor kane ka mat, u Myntri ula ong, “Mynta kane ka kam kala don hapoh ka jingbishar jong ka iingkashari. Ngan ym lah ban kren eiei than hynrei baroh ki don pat ia ka hok ban im”.
“Ai ba ka iingkashari kan shim ia ka rai bad hadien katei ngin sa ia kren” ula ong.
Haba kylli la ka sienjam kaba shim da ma u kum u MLA ka Pynthorumkhrah ha kaban pynbeit ia ka mat kaba iadei bad ki nongdie madan ha Golflink, dei ban pynbud mynta da ka sorkar ha kaba iadei bad ka mat ha Khyndailad, u Bah Hek ula ong, ryngkat ka jingiatreilang bad ka dorbar shnong, kila lah ban long kiba seisoh ha kaban pynkynriah ia ki nongdie madan ha Golflink sha ka Mall khlem da donkam ban siew pisa eiei, da kaba ai iaki ia ka jaka kaba biang ba kin lah ban bteng ia ka jingkamai jakpoh.
Ula ong, ba ka Golflink kadei ka jaka kaba itynnad kaba don ha Shillong namar ka jingdon jong ka madan ialehkai Golf.
Kane ka sienjam kala pynlong ia u Bah Hek ban kylla long u nongthawain uba nyngkong eh ha ka jylla ban tei ia ka Hawkers Market ha ka constituency.
“Baroh kine ki snem, naduh ka por ba nga dang shong ha ki klas rit, nga lah iohi ia kine ki nongdie madan kiba shong die jingdie ban kamai jakpoh ha ki surok jong ka thain Golflink.
Haba ngi ioh ia ka lad, ngi lah tei ia ka Hawkers Market. Lada ngam bakla, nga dei u politishan uba nyngkong eh uba la tei ia ka Hawkers Market kaba la ai ban shong ei ia ki nongdie madan, Kila don 28 ngut ha ka por kaba sdang. Ngi lah pynkynriah noh ia ki sha ka jaka kaba biang hynrei ha ka Mall la ai iaki ba kin shong ei” la ong u Myntri Sorkar.
Haba kylli la u sngewkmen bad ka rukom leh jong ka sorkar ha kaban weng ia ka jingeh jong ki nongdie madan, u Bah Hek ula ong, “Ngam shym la ong ba ka rukom treikam jong ka sorkar ka long kaba bakla, hynrei kadei pat ban ai ia ka jaka kaba biang ban shong die jingdie sha baroh ki nongdie madan kiba don hapoh jong ka Shillong Municipal Area.”
U Bah Hek ula pynpaw ruh ia ka jingsngewkhia ha kaba iadei bad ki post elektrik ha ka thain Golflink, ha kaba ula ong, ba la pynieng ia ki 4 tylli ki post elektrik kiba jrong bad heh ne High Masts bad ka jingpyrshang ka dang iaid shakhmat ban pynthikna ba ia katei ka jaka baroh kawei kadei ban long kaba shai kdar. Hynrei ula kubur pat ba kila don ki katto katne ki jingduna ha kaba iadei bad ka lain Technical ia kaba dang ia pynbeit mynta.
Ha kaba iadei bad ka jingpynslem ban pyndep ia ka jingpynitynnad ia ka thain Polo, u Bah Hek ula ong ba kane ka projek ka dei kaba dang iaid shakhmat bad ki nongtrei ki dang trei shaid shaid ia ka kam ha katei ka thain bad ula ong ba ka daw jong ka jingslem kadei namar ka jingkhia kam palat jong ka tnad sorkar bad ka jingpyntreikam u kontraktor ia ka projek.
