Shillong, Iaiong 25: Ka seng ki nonghikai Meghalaya Upper Primary Schools Teachers Association (MUPSTA) kala thoh daka shithi sha u Myntri Rangbah ka jylla Conrad K Sangma ba pynkynmaw halor ka jingdawa kyntiew kyrdan iaki 844 ngut ki nonghikai Upper Primary Adhoc Schools shaka Deficit system.
Lyngba ka shithi sha u Conrad ka MUPSTA kala pynkynmaw ba ka sorkar jylla kala dep ban phah sha baroh ki ophis Sub-Divisional School Education Officer jong ki district hapoh ka jylla bad sha baroh ki skul Upper Primary Adhoc Schools jong ka jylla naka bynta ban pynbiang iaki jingdonkam haba iadei bad ka jingkyntiew kyrdan iaki nonghikai sha ka Deficit naduh 2019-2020.
Ka shithi ka kdew ruh ba katkum ka kaiphod RTI naduh ki snem 1989-1990, kam shym la don kano kano ka jingkyntiew kyrdan iaki Upper Primary Adhoc Schools shaka Deficit System hapoh ka jylla Meghalaya.
Ka kdew ruh ba naka liang u Director ka School Education and Literacy ka sorkar jylla kala dep ban lum iaki jingdonkam haba iadei bad kane ka jingtyrwa ban kyntiew kyrdan iaki 844 ngut ki nonghikai Upper Primary Adhoc Schools shaka Deficit System katkum ka Memo No DSEL/EL/MICS/16/2010/PT-1/270 dated 9 April 2020.
“Mynta la 33 snem tam, kam shym la don kano kano ka jingkyntiew kyrdan iaki nonghikai Upper Primary Adhoc Schools shaka Deficit system hynrei mynta u snem 2023, ka MUPSTA ka kyrmen ba ka sorkar jylla kan pynurlong ia kane ka jingdawa” la ong ka shithi.
Nalor kane ka MUPSTA ka kyntu ruh iaka sorkar jylla ba kan thung 2 ngut ki nonghikai MUPSTA kum ki dkhot ka State Education Commission (SEC) naka bynta ban khmih iaka jingtreikam ka Elementary Education hapoh ka jylla Meghalaya.
