Shillong, Naiwieng 22 : Ka Khasi Students Union (KSU) hynne ka sngi Balang, kala pynkynmaw ia ki paid nongshong shnong ka Jylla ia ka jingdap shisnem ka jingshah siat iap ki san ngut ki paidbad ba lui lui ha ki Pulit ka Assam ha Mukroh, West Jaintia Hills.
Ka KSU kum ka dak ban kynmaw sngewlem ia kane ka sngi, kala pynieng ia ki flex bad ki banner ha kylleng ki jaka jong ka Nongbah Shillong ban pyntip sha ki paidbah ba ka jingjia Mukroh kala dap shisnem pura mynta ka sngi ka 22 tarik Naiwieng.
Ka KSU kala pynieng ia ki banner ha ki jaka ba marjan ka Main Secretariat, Mot Kiang Nongbah ba marjan ka Shillong Civil Hospital, ha Khyndai Lad, Motphrah, Laitumkhrah Square bad ha ki thain Golflink.
Katto katne na ki banner ki don ia ka jingthoh ba ong “Ka Mukroh ka dang dei ka jaka jong ka Meghalaya!!! Assam kein noh ia ka jingkyntur pud”, “Shisnem kynthih la dap hadien ka jingshah pyniap dusmon ki para Khasi ha Mukroh. Ka Sngi kaba dum ia ka Jaidbynriew”.
Haduh hynriew ngut ki briew kila iap bad arngut kila mynsaw jur ha ka jingther kuli jong ki Pulit ka Assam ha ka step 22 tarik Naiwieng 2022 ha Mukroh, West Jaintia Hills.
Kane ka jingjia kala jia na ka jingwan rung ki Pulit ka Assam bad ki Pulit ka Tnad Forest ban kem ia kawei ka kali kit dieng na Mukroh.
Tang hadien katto katne por, ki Pulit ka Nongbah Shillong kila leit ban weng noh ia ka banner bala wah hajan ka Main Secretariat bad ha ki katto katne ki jaka hapoh ka Nongbah.
