Lah khang ban ai bhah ia ki Garo nabar Meghalaya
Shillong, Jylliew 27 : Ka Sorkar Meghalaya Democratic Alliance-2 (MDA) kala ai jingmynjur ia ki kyndon bala pynkylla thymmai jong ki Office Memorandum bapher bapher kiba iadei bad ka Job Reservation Policy bala treikam ka Roster System.
Ka Sorkar kala shim ia kane ka rai ha ka jingialang jong ka Kynhun Myntri ba la pyniaid da u Myntri Rangbah ka Jylla Conrad K Sangma hynne ka sngi Ba-ar.
Haba iakren bad ki lad pathai khubor, ka Nongaiktien bad Myntri Sorkar Kong Ampareen Lyngdoh kaa iathuh ba ka Sorkar kala pynkylla thymmai ia ka OM ba pynmih ha u snem 1972 kaba iadei bad ka jingpynbna lait kam ia ki ST bad SC.
Kala ong ba kat kum ka OM barim “La ong ba ka jingdon ki kam bala pynbna ba ki lait ka dei ban long khyndai (9) ne ba duna ia kiba bala mang sha ki Jaidbynriew ba dei ban ioh, kan ym treikam shuh namar yn hap pyntreikam noh ia ki kyndon ka Roster ha ka Reservation”.
Kane ka mut ba nangne shakhmat, ki kam ba lait bad ba pynbna kin long noh kat kum ka roster ym shuh ha ka jingdon ki kam kiba lait ban pynbna.
Ka Myntri ka pyntip ruh ba ka kynhun Myntri kala pynkylla ia ka Office Memorandum bala pynmih ha u snem 1974 ba iadei bad ki kam ba lait ia kiba la mang sha ki paid Garo ia kiba la ailad wat ia ki Garo ba sah shabar ka Jylla ruh ki dang lah ban ioh ia ka bhah ki Garo.
“Nangne shakhmat, ki kam ba la mang sha ki paid Garo yn hap ban thep beit thik tang da ki samla wad kam Garo kiba dei napoh ka Jylla” ong ka Myntri.
Ka kynhun Myntri kala pynkylla ruh ia ka OM u snem 2020 ba iadei bad ka Reservation Roster naka bynta ki briew kiba don jingduna dkhot met ha kaba nangne shakhmat, ka jingaibhah ia ki briew ba duna dkhot met kan long kat kumba la buh ha ka Reservation Roster. Kane ka jingpynkylla ka mut ba ka OM kaba rim kan ym treikam shuh.
Ka Kynhun Myntri kala wanrah ruh ia ka kyndon thymmai ban pynrung ha ka OM jong ka Reservation Policy na ka bynta ki samla wad kam kiba thep ia ki kam ba lait ha ki District, kaba ong ba ki samla wadkam ba thep kam lyngba ki District Selection Committee ki dei ban pass ia ka ktien ka thylliej (local language) jong ka District.
