Pynkylla ka Sorkar ia ka eksam MCS | Lah pynduh ia ka Optional Subject | Yn wanrah da ka subject halor ka Meghalaya

Shillong, Nailar 07 : Ka Sorkar Jylla kala pynbna ia ki jingpynkylla kiba kongsan ha ka jingpyniakhun ia ka eksam Meghalaya Civil Service (MCS).

U Myntri Rangbah ka Jylla Conrad K Sangma ula iathuh ba ka Sorkar kala rai ban pynsangeh noh ia ka optional subject ha ka jingiakhun ia ka eksam MCS bad wanrah da ka subject ba thymmai ha Jylla.

Kumba long mynta, ki don palat 23 tylli ki optional subject ha ka eksam MCS.

“Kaei kaba jia ka long ba namar ki optional subject, don ki por ba ka jingiakhun ia ka eksam kam biang tarajur namar ka shong ha kito ki 23 sobject kiba lah ban jied bad don ki snem, don ki por ba ki optional subject ki kham suk haba nujor bad kiwei bad don pat ki por ba ka marker system ka kham suk haba nujor bad kiwei bad kane ka long kum ka jingai kabu kaba wan kat kum ka optional subject ba ki kyrtong ki shim. Ka dei ka kam kaba khia bha ia ka MPSC ban pynlong ia ki eksam jong kine ki optional subject bad haba pynshong nongrim ia ki jingai jingmut jong ka MPSC bad ka MSPC Reform Committee, ia kine ki jingai jingmut la ai bad ngi la rai ha ka jingialang ka Kynhun Myntri ban pdiang ia ki bad ia kine ki optional subject kiba don ha ka eksam MCS yn sa weng noh bad lashai lashisngi ngin sa wanrah ia ka subject kiba dei halor ka Meghalaya” ong u Conrad haba iakren bad ki nongthoh khubor hadien ba pyniaid ia ka jingialang jong ka Kynhun Mhyntri ha ka sngi Palei.

Kat kum ka jingong u Myntri Rangbah, ka rai ban wanrah ia ka subject halor ka Meghalaya ka dei kaba la thmu ban pynthikna ba ki Ophisar MCS ki dei kiba sngewthuh bha ia ka jinglong jingman ka Jylla, ka histori bad ka kolshor. Kane kan ailad ia ki ban shakri kham bha ia ka Jylla”.

“Namar kata, ngin weng noh ia ka optional subject bad ngin wanrah da ka subject halor ka Jylla Meghalaya jong ngi” ula bynrap.

U Myntri Rangbah u pyntip ba kan sa don ka committee lane ka kynhun ki Heh Ophisar kiban sa pynkhreh ia ki jingdonkam bad ban ai jingmut ia ka subject ba kum kaei bad kiei kiba dei ban don ha ka.

“Kane ka long ka rai kaba kongsan bha bad ka jingpynkylla kaba kongsan, ka ban iarap ha kaban pynlong ia ka eksam MCS kham sted bad kaba kongsan, kan ai ia ka madan ialehkai ba kumjuh ia baroh ki kyrtong kiba iakhun” ula ban jur.