Gogamukh, Nailur 05 :Katba ki nonghikai skul kila rakhe ia ka sngi ba kyrpang jong ki mynta ka 5 tarik, hynrei ka jingjia ba sngewsih kala wan jia ha ka thain Bordoloni, hapoh Dhemaji District ka Assam hynne ka sngi Nyngkong hadien ba la lapdien ia uwei u nonghikai skul uba la phasi noh ia lade halor uwei u dieng namar ka jingbym ioh tulop.
Ia une u nonghikai skul la tip kyrteng kum u Rajen Bania, bad katkum ki khubor la ong ba u Bania ula pynkut noh iala ka jingim namar ka jingbym ioh tulop. La ioh jingtip ba u Bania u dei u assistant teacher hapoh No. 503 Auniati Kaivarta Lower Buniyadi School.
Ka long ruh kaba sngewkyndit ban shem ba ia kane la skul la sdang naduh shwa ba ka India kan ioh ia ka jinglaitluid, hynrei ia kane ka skul ym pat shym la ithuh satia da ka sorkar kat haduh mynta.
Na ka liang kiba haiing hasem jong une u nonghikai kila pynpaw lyngba ka lad pathai khubor da kaba ong u Bania ula pynkut iala ka jingim namar ka jingban khia ha ki jingmut jingpyrkhat namar ba ia kane ka skul ym pat shym la ithuh satia da ka sorkar wat hadien 75 snem mynta.
Lah ban kdew hangne, ba ki don kumba 2,659 tylli ki skul hapoh Assam kat haduh mynta. Kine ki kynthup ia 1,256 ki lower primary (LP) school, 889 middle English (ME) schools, 431 high schools, 45 higher secondary schools, bad 38-degree colleges, kane kalong katkum ka jingioh lum jingkhein na ka All Assam Non-Provincialized Teachers’ Association.
