Shillong Nailur 18: U President ka Meghalaya Pradesh Congress Committee (MPCC) u Bah Vincent H Pala, ula ong, ba ym don jingthmu ban leit pyniasoh noh ialade bad ka seng National Peoples Party (NPP) kumba la saphriang ki khubor ba yn pynkhreh ban iakhun ia ka elekshon MP Lok Sabha 2024.
“Ngam don jingmut eiei ban leit pyniasoh bad ka NPP, nga lah ban don ka jingiadei bad jingiajan bad kino kino jong ki seng sain pyrthei hynrei kam mut pat ba ngan leit pyniasoh noh bad ki” ong u Bah Vincent Pala.
“Ynda la jop ngi hap ban iatreilang na ka bynta ka bha ka miat jongu paidbah. Nga uba don ha ka liang pyrshah nga hap ban leit sha ka liang synshar ban kyrpad ban wanrah ia ki kam pynroi bad teng teng kiba don ha ka liang synshar ki wan sha ngi ban pan ia ka jingkyrshan ha kano kano ka bynta, kumta ngi hap ban iadei bad ngi hap ban iatreilang. Kumta ki briew ki jong ngi kim dei ban sngewthuh bakla” ong u Nongialam ka seng Congress.
Ula ong ba ka jingiadei bad kino kino kam dei satia na ka bynta ka kam shimet bad kam mut ba ka jingiajan bad u Conrad Sangma ne Metbah Lyngdoh yn leit noh bad ym dei uta uba lah ban shu pynbiej klumar.
Ha kaba iadei bad ka jingiaid ki khana ba dei ban pynrem noh ia u MP ba mynta na ka Shillong Parliamentary Seat, u Bah Pala ula ong, “Man la ka elekshon kan mih beit kane hynrei kane baroh kan shong ha u paidbah, ngi kiba la ialeh iaka elekshon ngin ialeh beit kumta baroh kan shong ha ki paidbah ym ha ki nongialeh iaka elekshon. Nga la pyrshang ban treikam hynrei baroh kan shong beit ha u paidbah”.
