Shillong, Risaw 06 : U Myntri kam Pohiing ka Jylla ma Lahkmen Rymbui hynne ka sngi palei, ula pynkup burom ia palat 300 ngut ki samla ha ka 7th Amlarem LA Constituency Academic Award Ceremony bala pynlong ha Enowell Hall, Amlarem.
Ia kane ka jingialang la pynshongkun ruh da ka jingiadonlang ki Heh Ophisar ka Jylla ba kynthup ia u Chief Secretary ka Jylla Bah DP Wahlang, u Director General of Police (DGP) Dr LR Bishnoi, u Commissioner and Secretary ka Tnad Pule Puthi Dr BDR Tiwari bad kiwei kiwei.
U Myntri kam pohiing haba kren ha ka jingialang, ula buh ka jingkyntu ia ki samla pule ba kim dei ban kein ia ka jingwad jingstad hynrei ban bteng ha kaban wad ia ki jingnang jingtip palat ia kiba ioh na ki kot bad ia kane lah ban leh mynta da ka jingiarap jong ka kor Internet.
Ula kdew ba ki don bun bah ki briew kiba wan na shabar ka Jylla ban trei ha Meghalaya namar ki iohi ia ki lad ki lynti bad kane ka pyni ba kam don satia ka jingkyrduh kam hangne. Namar kata ka long kaba donkam ban sngewthuh ba mano mano ruh ki lah ban iohkam wat shabar na ka kam sorkar.
U Chief Secretary Bah Donald P Wahlang ula iaroh bad ai khublei ia ki Nonghikai namar dei ma ki, kiba saindur ia ka imlang sahlang bad ki samla kiba ioh mynta ia ka khusnam ki dei u soh ka jingtrei shitom jong ki Nonghikai.
U Dr. LR Bishnoi ula kyntu ia ki samla pule ba hadien ba kila pyndep ia ki jingpule jong ki, ki dei ban nang iai trei shitom bad ban kiar lailum laiwah ialade na u droks.
