Shillong, Nailur 02 : U Lat ka Jylla Vijayashankar hynne ka sngi Nyngkong, ula pynkup burom ia ka kynhun ialehkai U-15 ka Nongjri Presbyterian Secondary School, Ri-Bhoi, kaba la ioh rah ia ka namtam (Champion) jong ka 63rd Subroto International Cup dang shen ha Bengaluru.
Ia kane ka jingialang pynkup burom la pynshongkun da ka jingiadonlang u Myntri Rangbah ka Jylla Conrad K Sangma, u Myntri kam ialehkai Bah Shakliar Warjri, u MLA ka Mawhati Charles Marngar bad kiwei kiwei ki heh Sorkar.
U Lat ka Jylla haba ai jingkren ula ong “Naba nga ruh nga dei u riew ialehkai, nga lah ban pynithuh bad kine ki khynnah ialehkai. Ban jop ia kat kane ka lympung kaba heh kam dei kaei kaei kaban shu khein sting. Nga ngeit ba ka por kaba biang eh ia uno uno u khynnah ban hikai ka dei hapdeng ka rta ba 6 haduh 16 snem, bad da kane ka jingmut jingpyrkhat, ka long kaba ai mynsiem ban iohi ia ka jingtbit ha kum kane ka rta”.
U Lat ka Jylla ula ai ka jingiaroh ruh ia ka jingshimkhia jong ka Sorkar Jylla ban kyrshan ia ka kynhun ba kan lah ban jop ia kane ka lympung. Ula nang kyrpad ia ka Sorkar ba kan iai bteng ban shimkhia ha kaban kyntiew ia ki kam ialehkai naba ki samla ki dei kawei na ki nongkynti ba kongsan tam jong ka Jylla.
Haba ai jingkren, u Myntri Rangbah ka Jylla ula ong “Kane ka dei ka khyllipmat kaba kmen bad ba sngewmyllung bha. Ka dei ka jingleh sbun, jingsngewrit bad jingpyrkhat bha jong u Lat bad ngam ju kynmaw ban don uno uno u Lat u ban pyn kup burom ia kino kino ki nongialehkai bad nga ai khublei ia u halor kane ka sienjam ba ula shim”.
Haba kren halor ki prokram kiba la Sorkar kala shim ban kyntiew ia ki kam ialehkai, u Myntri Rangbah ula ban jur ba ka Sorkar kala kynshew bun bha ha ki jingtei ia ki madan ialehkai ha kine ki khyndiat snem bala leit noh. Ula ong ruh ba kane ka Sorkar ba mynta kala lah ban pynlong haduh lain a ki san tylli ki Meghalaya Games. Ula pyntip ba ki Sports Association jong ki jingialehkai bapher bapher kila ioh ia ki song jingiarap pisa ban pynjanai bad lah pyniaid bha ia ki jingialehkai ba ki khmih.
Ha kaba pynkut u la ong, “Haba kylli shaphang ki jingmih bad ki jingthew ban thew ïa ka jingkiew jong ki jingïalehkai bad kumjuh ruh shaphang ka jingbei tyngka kaba heh ban kyrshan bad shna ia ki madan, nga ong ba ka sap ialehkai bapher bapher kaba la rung ha ki samla ka dei kaba ai jinghun. U soh uba pynhun tam ka long haba nga la ïohsngew ïa ka jingkren jong u Manager ka kynhun bad u Bah Charles Marngar, nga da sngewkmen ban ïohsngew ba ki khynnah ki la kut jingmut ban ioh ia ka jingjop wat hapdeng ki jingeh na ka jingbym biang ki madan. Khlem pep ngan iarap ban wanrah ia ki madan ialehkai ba shipor naka Chief Minister’s Special Development Fund katba dang ap ban buh ia ka madan ialehkai kaba paka ha ka thain”.
Ka kynhun ialehkai kaba la shah pynkup burom ki kynthup ia u Yeomanly Son Shadap, lainehskhem Marboh, Prosperwell Ryntong, Richmond Lapang (Captain), Yeomanly Son Shadap, lainehskhem Marboh, Prosperwell Ryntong, Richmond Lapang (Captain), laisynroplang Syiemlieh, Franky Kharkrang, Dasuk Banphrang Diengdoh, Marc R Marak, Shanbok Basaiamoit, Nangsanbha Warjri, Banteilang Malieh, Pynshngain Khapew, Samuel Malieh, Namebanlam Nongkseh, Chanjib Chettry, Thrisilbirth A Sangma, Shri Jeffery Warlarpih, Shri Pynkhreh Nongkseh.
 jong ka 63rd Subroto International Cup dang shen ha Delhi.){kind=link}