Shillong, Naiwieng 11: U Lat ka Jylla CH Vijayashankar ha ka sngi Ba-ar. u la sam iaka khusnam Governor’s Scouts and Guides Award sha palat 350 ngut ki Scout and Guides bad u la ai khublei ruh ïa M Wahlang bad Purnima Thapa, kiba la ïoh ïa ka khusnam President’s Scouts and Guides Award.
Haba kren kum u Chief Patron ka Meghalaya Bharat Scouts & Guides ha ka jingrakhe dap 75 snem, u Lat u la ai ka jingïaroh ia ki Meghalaya Bharat Scouts & Guides ha kaba pynroi ïa ki jinglong ba kordor jong ka akor, ka jingshakri, ka jingsngewrit bad ka jinglong nongïalam hapdeng ki samla ka Jylla.
U Lat u la ai khublei ruh ïa ka jingïalam u State Chief Commissioner ba dei ruh Commissioner & Secretary ka tnat Pule Puthi, iaka jinglah ban pynlong ïa ki prokram bad ki workshop kiba la ïarap ïa ki samla shynrang bad kynthei ban roi ban par daka ka jing koit jing khiah bad kaba don ka jingkitkhlieh.
U la ban jur ia ka jingdonkam ban wanrah ki jingsngewthuh kham bha shaphang ka jingsumar ia ki khlaw ki btap, ka jingsngewthuh ia ka jinglong ka suinbneng bad ki rukom treikam kiba lah ban pynneh pynsah ha ka Jylla Meghalaya.
U Lat u khot bad wer ia ki Scout and Guides ban thung la kumno kumno uwei u dieng bad ban thaw daki kynhun ban ialam ia ki samla na ka bynta ban iada ia ki khlaw, ban pynneh pynsah ia ki jingthaw ba im, ban pynduna ia ka jingpyndonkam ia ki plastic bad ban kyntiew ia ka jinglong ba don jingkitkhlieh ha ka mariang haka imlang sahlang.
Haba pynpaw ïa ki jingeh kiba nangroi ba kiba ki samla ki ïakynduh ha kine ki por, u Lat ka Jylla u la ban jur ïa ka bynta kaba kongsan ba ki Scout and Guide ki leh ha kaba pynwan dur ïa ki jingmut jingpyrkhat jong ki samla kiba don ka jingthmu kaba bha bad ka jingkitkhlieh ha ka imlang sahlang.
