Shillong, Rymphang 9: U Lat ka Jylla Meghalaya CH Vijayashankar ha ka sngi Nyngkong u la ai khublei bad kitbok kitrwiang ïa ki rangïalehkai jong ka All Meghalaya Kick-Boxing Association (AMKA) ki ban mih khmat ïa ka Jylla bad ia ka ri India ha ka lympung ïalehkai ba pawnam jong ka Asia Pacific Open Kickboxing Championship 2026 ha Bali, Indonesia ka ban long ha ka 28 tarik u Rymphang.
U Lat u la ai khublei ia ka kynhun na ka bynta ka jingaiti lut, ka jinglong ba ryntih, bad u kitbok kitrwiang ia ki ba kin lah ban lehkai bha.
U la ïaroh ïa ka jingtrei shitom bad jingminot jong ki, da kaba pynpaw ba ka jingïashim bynta jong ki ha ka lympung ïalehkai ha ka international tournament kaba don kum kane ka nam ka la wanrah ïa ka jingsarong bad jingithuh ïa ka jylla Meghalaya.
U Lat u la ïaroh ïa ka jingtrei shitom jong ka All Meghalaya Kick-Boxing Association ha kaba ialeh ban kyntiew ïa ki sap ki phong ha kylleng ka Jylla bad ai ruh ïa ka rynsan ïa ki samla ba kin paw ha ki jingïalehkai ba ïakhun.
U la ban jur ba ka kam ialehkai kam tei tang ia ka bor met hynrei ki pynroi ruh ia ka jinglah ban shah ha ka bor pyrkhat, ka jinglong, bad ka jinglong nongialam hapdeng ki samla.
Haba pynpaw ïa ka jingdonkam jong ka jingïalehkai ha kaba pynwan dur ïa ka imlang sahlang ka ban kiew shaphrang bad kaba sngewskhem, u Lat u la pynshlur ïa ki nongïalehkai ba kin ïai bteng ban ïaleh ban long kiba tbit bad ban long kum ki nongmuna ïa ki nongïalehkai kiba kwah ban long ki nongïalehkai ha Meghalaya. U la pynpaw ruh ïa ka jingdonkam ban ïoh ïa ka jingkyrshan kaba skhem bad ka jingpynroi ban kyntiew ïa ka jingïalehkai martial arts bad kiwei kiwei ki jait jingïalehkai ha ka Jylla.
Ki thei bad ki rang ïalehkai ki la pynpaw ïa ka jingsngewnguh ïa u Lat ka jylla halor ka jingai mynsiem jong u bad pynthikna ba kin leh tyngeh katkum ka jinglah jong ki kaba bha tam ha kane ka lympung ïalehkai ba la pynlong ha Bali, Indonesia, kaba la sakhi ïa ka jingïashim bynta na ki katto katne ki ri ha kylleng ka thaiñ Asia-Pacific.
Kane ka jingia phylliew jingmut ka kut da kaba u Lat ka Jylla u la ai ka jingkitbok kitrwiang ïa ki nongïalehkai na ka bynta ki jingpyrshang jong ki ha ka lawei bad pynthikna ïa ka jingai mynsiem kaba bteng sha ka jingkiew jong ki kam ïalehkai hapoh ka jylla Meghalaya.
 ki ban mih khmat ïa ka Jylla bad ia ka ri India ha ka lympung ïalehkai ba pawnam jong ka Asia Pacific Open Kickboxing Championship 2026 ha Bali, Indonesia ka ban long ha ka 28 tarik u Rymphang.){kind=link}