Shillong, Naitung 19: Ka Kynhun Myntri jong ka jylla hynne ka sngi Thohdieng kala ai jingmynjur ban pynkylla kyrteng ia ki katto katne ki surok bad ki jingtei ha ka jylla ba kynthup ka jingpynkup burom ia u Bishop Mamalassery da kaba jer ia ka surok Holy Cross ha ka kyrteng jong u.
Ïa kateo la pynbna da u Myntri Rangbah ka Jylla u Conrad K Sangma hadien ba la wai ka jingïalang jong ka kynhun myntri.
Ki surok bad ki jingtei ba la jer kyrteng thymmai ki kynthup:
– Ka surok na ka National Highway 217 sha Ïew Baghmara, yn khot noh mynta da ka surok Capt. William Sangma.
– Ka Raitong Building, la pynkylla kyrteng sha ka Lum Shillong Building.
– Ka surok na Nongsawlia kaba iaid lyngba sha Saitsohpen-Mawsmai, la pynkylla kyrteng sha ka Thomas Jones Road.
– Ka surok na Mawkhar Community Hall shaduh Jaiaw Langsning, la ai kyrteng mynta sha ka Hubert Gordon Robert Road.
– Ka GNM School of Nursing yn tip noh mynta kum ka GNM School of Nursing Paham Syiem, Nongpoh.
– Ka surok PA Sangma ha Tura sha Holy Cross Hospital, la pynkylla kyrteng noh kum ka Bishop George Mamalassery Road.
U Conrad Sangma ula ong ba ia katei ka surok kaba la ju tip mynshwa kum ka surok Holy Cross mynta yn pynkylla kyrteng noh, kum ka jingkynmaw burom ia u Bishop ka Balang Katholik uba la shakri slem tam ha Tura, u Bishop George Mamalassery uba la khlad noh dang shen ha ka 5 tarik Jylliew.
