Shillong, Feb 26: Ka Sorkar Jylla hynne ka sngi Balang, kala pynkup burom ia ki 5 ngut ki nongialehkai kiba ioh khur takma ha ka 38th National Games kaba dang shu kut shen ha Uttarakhand.
Ia kine ki nongialehkai la pynkup burom da u Myntri Rangbah ka Jylla Conrad K Sangma ha ka jingialang kaba la pynlong ha State Convention Centre, Shillong.
Ki phra ngut ki nongjop takma ka Meghalaya ha ka 38th National Games ki kynthup ia u Vikash Rana (Ksiar), Elizabeth Vincent (Rupa), Indra Sharma (Rupa), Pynshngain Kurbah (Bronze) bad Kiran Devi & B. Anandhi (Bronze), baroh kine ki la ioh takma ha ka jingiakop niah lieng.
Haba ai jingkren, u Myntri Rangbah haba ai khublei ïa baroh ki nongïalehkai kiba la ïashim bynta ha ka National Games kaba 38 u la ong, “Katba nga ai khublei kyrpang ïa u Vikash, Elizabeth, Indra, Kiran, Anandi bad Pynshngain kiba la khur ïa ki takma, nga ai khublei ruh ïa baroh ki nongïalehkai jong ngi kiba la trei shitom ban ioh mihkhmat ia ka jylla jong ngi ki jinghikai ialehkai bapher bapher.”
U Myntri Rangbah u la sam ruh ïa ki khusnam pisa sha ki nongjop ha ki jingïakob bad ki lympung ha ki jait jingïalehkai bapher bapher.
Ula ai ruh ia ka jingkyrshan pisa ba T.1 klur ïa ka Shillong Lajong bad haduh 350 ngut ki nongïalehkai kila ioh ia ka khusnam pisa ha kane ka sngi la pyllait paidbah ruh ïa ka Meghalaya Sports Action Plan 2025-32 bad ka Chief Minister’s Football Mission.
Lah ban kdew, ïa ka jylla Meghalaya la ïoh ïa ka hok ban pynlong ïa ka jingïalehkai National Games kaba 39 bad la khmih lynti ba kan long ha u bnai February ne Lber 2027.
