Shillong, Nohprah 17: Ka Thynroit Presbyterian Upper Primary School ha ka taiew ba la dep ka la pynkup burom ia ki nongseng jong ka skul, kaba long shi bynta na ka jingrakhe dap 50 snem ka skul ha ka jingïalang kaba i shongkun.
Ha kane ka jingïalang la wan ban iadonlang da u Bah Banteidor Lyngdoh, MLA ka Mawkynrew kum u kongsan, u Bah Martle N Mukhim uba dei u MDC kum u kongsan, u Bah Harkin Warjri, Sordar ka shnong Thynroit nalor kiwei kiwei.
Na ka liang u Bah Banteidor haba ai jingkren kum u kongsan u la ong ba kum u nongmihkhmat u tyrwa ban don ia ka jingïatreilang khnang ba ka skul bad ka thain hi kan kiew sha khmat.
Kum ban shu kdew ba dang ha u bnai Jylliew, 2023, u Bah Banteidor u dang shu wan plie ia ka ïing skul ba thymmai jong ka Secondary Section kaba dei shi bynta jong kane ka skul na ka mang tyngka jong ka skhim Special Rural Work Programme (SRWP) 2022-2023.
Ia kane ka prokram la pynshongkun da ki jingshad jingrwai na ki khynnah skul, la ioh ruh ia ka jingkren na u Headmaster ba nyngkong eh ka skul, u Bah H Kharumnuid, uba la pynkynmaw shaphang ki por bad ki jingiaid lynti ka skul ha ki snem ba la sdang ia ka naduh u snem 1973.
U Bah Martle N Mukhim u la shim ia ka bynta ban pynkup burom ia ki khynnah skul kiba la pass ia ka eksam Secondary School Leaving Certificate mynta u snem jong kane ka skul bad ha ka jingai jingkren u la ai ki kyntien kyrkhu kyrdoh ba ka skul kan nang iai kiew sha khmat ha ki liang baroh.
La pynkut ia ka jingrakhe da ka jingot ia u cake jingdap 50 snem ka skul da u kongsan lem bad u symbud kongsan nalor ki bor pynïaid skul bad ki nonghikai.
