Nongpoh, Risaw 25: Ka Ri Bhoi Youth Federation (RBYF) lyngba ka Education Cell ha ka sngi Thohdieng, ka la pynkup burom ia ki samla kiba pass bha ha ka eksam SSLC bad HSSLC 2024, kynthup ruh ia 3 tylli ki skul kiba wanrah nam na ka International Subroto Cup.
Ka RBYF kala pynkup burom ruh ia 2 ngut ki riew rangbah ba pawkhmat ka thain, kiba la wanrah ia ka nam bad ka burom ia ka Ri Bhoi District.
Ia kane ka jingialang pynkup burom la pynlong ha ophis treikam ka RBYF, Saiden bad la wan ban pynshongkun da u Director ka MBoSE Bah M. Marbaniang kum u kongsan ha ka jingiadonlang u Bah Raju Rijal, SDSEO ka Ri Bhoi District, Bah Rayonald Kharkamni, President ka RBDCA bad kiwei kiwei.
Ka RBYF ka la sam da ki momentos bad pisa sha ki 15 ngut ki samla pule kiba la pass bha ha ka HSSLC bad 9 ngut ha ka SSLC.
Ki arngut ki riew rangbah kiba la shah pynkup burom ki kynthup ia u Bah Everlasting Pyngrope u ba ioh ia ka National Teachers’s Award, Bah Rayonald Kharkamni, u ba la shah jied kum u match Observer na bynta ka jingialehkai test cricket hapdeng ka ri India pyrshah ia ka New Zealand kaban sa long ha Mumbai.
Ki lai tylli ki skul kiba la shah pynkup burom ki dei ka Nongjri Presbyterian Higher Secondary School kaba la rah ia ka nam lahduh ha ka U-15 Subroto International Cup ha New Delhi, nangta ka Christian Higher Secondary school bad ka Mynken Christian Higher Secondary School.
Haba kren ha kane ka sngi, u Bah Bipul Thangkhiew u la pynpaw, ba ka seng ka don ia ka thong ban kyntiew ia ka pule puthi hapoh ka district kumta ka iai ai mynsiem ia ki samla pule kiba wan shakhmat ha ki eksam bapher bapher.
U pyntip ba ka Seng ka ju air uh ia ki kynja scholarship ban kyrshan ia ki samla pule kiba wan na ki longiing baduk.
U Bah Bipul u iathuh ba ka seng hadien ba kala plie ia ka ophis treikam, ka don ia ka thong ban pyn long ia ki programme coaching na bynta ki samla pule kiba angnud ban iakhun ia ki competitive examinations kum ka NEET da kaba ia treilang ruh bad kawei ka kynhun kaba na New Delhi kaban long shisha ka jingmyntoi kaba khraw ia ki khun samla ka dong ka thaiñ Ri Bhoi District nalor kiwei kiwei ki kam ba ka seng hi ka ju shim ka jingkitkhlieh.
Na ka liang u Bah M. Marbaniang Director ka MBOSE, u la ai ia ka jingiaroh ban sakhi ba ka RBYF ka la shim ia ka sienjam ban kyntiew ia ka pule ka dangle ha ka thain.
“Ha kane ka juk ba mynta ngim lah shuh ban ia khun da ka bormet hynrei da ka jabieng da ka jingstat, kumta kum ki samla pule ki dei ban kheiñ kor bha ia ka jingpule ban ioh ia ka jingnang jingstad kaba kordor bad ban ioh ruh ia ka jingithuh kaba kyrpang ha ka lawei ban wan”, ong u Bah Marbaniang.
 lyngba ka Education Cell ha ka sngi Thohdieng, ka la pynkup burom ia ki samla kiba pass bha ha ka eksam SSLC bad HSSLC 2024, kynthup ruh ia 3 tylli ki skul kiba wanrah nam na ka International Subroto Cup.){kind=link}