Shillong, Jymmang 09 : I Kong Silbi Passah iba dei i longkmie iba pawnam ha kaban pynneh pynsah bad kyntiew iaka rwai bad ka shad tynrai u Khasi-Jaintia, hynne ka sngi Palei, ila ioh pdiang ia ka khusnam Padma Shri 2024.
Ia katei ka khusnam la sam da ka President ka ri, ka Droupadi Murmu ha ka Civil Investiture Ceremony kaba long hynne ka sngi ha Rashtrapati Bhawan, ha kaba la ai jingithuh kyrpang ia u synniang uba la noh da i Kong Passah ha ka liang ka rwai bad ka shad tynrai.
I Kong Silbi ha u snem uba la dep ila ioh pdiang ia ka khusnam Sangeet Natak Akademi Award na ka bynta u snem 2021 na ka President Droupadi Murmu.
I Kong Silbi Passah ila phong da ka riam tynrai ki Jaintia kaba kynthup ia ka Khyrwang, ka Muka ryngkat bad ka Ryndia ha ka por ba ka leit ban shimti ia katei ka khusnam Padma Shri na ki kti jong ka President ka Ri.
U Myntri Rangbah ka jylla u Conrad Sangma ula ai khublei ia i Kong Passah halor ka jingioh pdiang ia katei ka khusnam kaba pyni ruh ba ka jylla Meghalaya ka dei kaba riewspah ha ka tem bad rwai tynrai.
U Conrad ula ai khublei lyngba ka X, da kaba pynpaw “Ka President ka ri, ka Droupadi Murmu kala aiti iaka khusnam Padma Shri sha i Kong Silbi Passah iba la pawnam bha ha kaba iadei bad ka tem ka put tynrai ki paid Khasi Jaintia. Nga ai khublei kyrpang ia i. Kane ka khusnam kadei ruh ka jingithuh ia ka jingriewspah ka Meghalaya ha ka tem ka put tynrai”.
I Kong Silbi ym tang ba ila noh synniang ha ka tem ka put, ka shad ne ka rwai tynrai hynrei ila noh synniang ruh ha kaba iadei bad ka pule puthi bad I dei iba shongthait kum i nonghikai ia ka sobjek Hindi bad ila long ruh kum ka riewshemphang kiba ai jingkren ha kiba bun ki jingialang kiba la pynlong ha ki jaka pule bapher bapher.
I Kong Silbi Passah ila trei shitom ruh ha kaban kyntiew ia ka ktien Hindi ha ka jylla bad ila iashimbynta ruh ha ki prokram jong ka Radio kum ka “Hindi Lesson” ha All India Radio Shillong bad idei ruh I longkmie Khasi ba nygkong eh ban pynmih ia ka drama lyngkot da ka Hindi kaba la pyni ha ka Doordarshan Kendra, kaba la pyni shuh shuh iaka jingshemphang ine i longkmie ha kaban kyntiew mar kylliang ia ka kolshor bad ia ka pule puthi.
