Shillong Nailar 30: Ka College of Teacher Education (PGT) Shillong, ha ka sngi Saitjain kala pynlong ia ka jingialang pynkup burom ia ki samla pule kiba pass bha ha ka B.Ed. Eksamin 2025 bad ruh kiba lah ioh ia ka jingithuh kum ki nonghikai ba tbit ha kane kajuh ka eksamin.
Ha kane ka sngi pynkup burom la don ryngkat da u myntri sorkar uba khmih ia ka tnad ialehkai u Bah Shakliar Warjri kum u Kongsan ryngkat ka jingdonlang ka Principal ka College ka Dr. B. Tron, ki nonghhikai bad kiwei kiwei.
Haba kren ha ka jingialang u Bah Shakliar Warjri ula pynpaw halor ki jingeh ba ki briew ki ïakynduh ha ka jingim bad kumjuh ruh ia ki jingeh kaba ki nonghikai ki ïakynduh ha ka kam hikai, da kaba ban jur ïa ka jingdonkam jong ka jingïaishah bad ka jingaiti lut jong ki nonghikai ha la ki kam hikai.
U Myntri, ula ai burom ia la ka jong ka jong ka jingjop jong u ha ka jingim ia U Blei, ki kmie ki kpa bad ki nonghikai jong u, da kaba pynpaw ia ka bynta kaba kongsan kaba ki nonghikai ki leh ha kaba pynwan dur ia ka jingim jong ki khynnah bad ula kitbok kitrwiang ia ki samla pule ba kin ioh ia ka lawei kaba phyrnai bad kaba jop, da kaba ai mynsiem ia ki ba kin ialeh ban long kiba tbit ha baroh ki kam jong ki.
U Bah Shakliar ula kular ban ai jingiarap ban pynkhlaiñ ïa ki lad jingïalehkai ha ka College, da kaba pyrkhat kyrpang ïa ka jingpynbha ïa ka jaka ïalehkai kilan met kaba la don lypa ha ka College of Teacher Education (PGT) Shillong. Kane ka jingkular ka pyni ia ka jingpyrshang jongka sorkar ban shim ia ki sienjam ban kyntiew ia ka jingroi jingpar kaba pura hapdeng ki samla pule bad ki nonghikai kumjuh lyngba ki jinglehkai ki bapher bapher.
Ka Dr. B. Tron kala ai khublei kyrpang ïa ki samla pule kiba lah pass bha ha ka Eksamin B.Ed. 2025 bad kumjuh ia ki nonghikai halor ka jinglah jong ki ban long ka nuksa ia ki khynnah ba pule ha ka College bad kala kyrpad ruh ia u Myntri ban ai jingkyrshan na ka tnad ïalehkai ban pynkhlain ïa ki jaka ïalehkai ha ka College.
Ia kane ka jingïalang la pynshongkun da ki jingrwai, ki jingshad bad ka prokram kolshor da ki samla pule ba mynta jong ka kolej ryngkat bad ka jingpynkup burom ba kyrpang ïa ki 5 ngut ki Nonghikai ba tbit bad 6 ngut ki nongïoh kyrdan ha ka Eksamin B.Ed. 2025, kaba la pynlong ban ithuh kyrpang ia ka jingtrei shitom, ka jingaiti bad ka jingtbit jong kine ki samla ha ka jingpule jong ki.
 Shillong, ha ka sngi Saitjain kala pynlong ia ka jingialang pynkup burom ia ki samla pule kiba pass bha ha ka B.Ed. Eksamin 2025 bad ruh kiba lah ioh ia ka jingithuh kum ki nonghikai ba tbit ha kane kajuh ka eksamin. ){kind=link}