Shillong, Nailur 20 : Ka Martin Luther Christian University hynne ka sngi Thohdieng kala pynlong iaka Annual Convocation ha Lariti International Centre for Performing Arts and Culture bad ha ka sngi, kila don 1044 kiba la ioh pdiang ia ki Degree bad Diploma kaba la pynlong ia kane ka skulbah ban jam sha uwei pat mawmer ha ka jingai iaka jingnang jingstad.
Na kitei ki samla pule 20 ngut kila ioh pdiang iaka PhD degree.
U Casper Syiem ula pyllait paidbah ia jingshna kaba la tip kum ka “Stories by the Fireside” mar ia sdang ia ka prokram bad kane ka jingshna ka iaid ryngkat bad iahap bad ka riti ka dustur bad ka jingiathuhkhana lyngba ka jingpyni dur kaba pyni iaka jingriewspah ka skulbah ha kaba iadei bad ka spahbah haka kolshor.
U Fr Stephen Mavely, u Vice Chancellor barim ka Assam Don Bosco University ula ai jingkren kyrpang ha kane ka jingialang.
Ha ka jingkren jongu ula kdew ia ki lai tylli ki jingpyrkhat kiba kongsan kiba baroh ki khynnah pule kidei ban buh jingmut bha, kaba kynthup ban nang ban phohsniew, ban buh ia ka thong katba lah mardor bad ban pdiang ia ka lynti kaba hap ban iaid nangneshakhmat.
Ula pynkynmaw ruh ia ki samla pule ba man la ka por haba ki iakynduh ia ki jingeh, kadei ka jingtynjuh ban peit haduh katno ki skhem ha ka nongrim ka jongki. Ki jingeh kidei ban hikai iaki ia kiei kiei baroh kiba kiba donkam ban iakynduh ia ka jingkut jong ka jingiaid lynti ka jongki.
U Chancellor ula aiti ruh iaka ‘Citation’sha u Convocation Speaker u Fr. Stephen Mavely.
La sam ruh ha kane ka sngi ia ka Alumni Awards sha ki 6 ngut ki samla pule kiba rim kiba kynthup ia Lovitoli Awomi, Morealda Paswet, Parkordor Kharkongor, Iadalin Warbah, Lalonging M. Lyngdoh bad Rinyei Khamrang bad la ruh iaka jingaikhublei kyrpang sha ki 19 tylli ki skulbah kiba iatreilang bad ai iaka jingkyrshan.
La pynkut ia kane ka Convocation, da ka jingpyrbyrngia na ki kynhun tem kiba kynthup ia ka Kdormaju, Amalgam, In Flux bad Ras Johanan.
