Shillong, Nailar 30: Hadien ka jinglah ki rangialehkai U-20 ka Lummawbah Sports & Cultural Club (LSCC) ban pynkiew na ka kyrdan 4th Division sha ka kyrdan 3rd Division ha ka lympung ialehkai jong ka SSA U-20 4th Division, mynta ka sngi ka LSCC kala pynkup burom ia kine ki rangialehkai jong ka club.
Ha kane ka sngi la wan ban ia don lang ryngkat da u President ka Meghalaya Football Association (MFA) uba dei ruh u Adviser jong u Myntri Rangbah u Bah Hamletson Dohling, u Vice President ka Shillong Sports Association ba dei ruh u President ka Nongkseh Sports Club Bah Daniel Thangkhiew, Rangbah Shnong ka Lummawbah Bah E Thangkhiew nalor ki nongkitkam ka club, ki nongialehkai bad ki paidbah nongshong shnong ba shah khot sngewbha.
Ha kane ka sngi, u Bah Hamlet u la ai sngewbha da ka song pisa sha broh ki rangialehkai bad ki Coach jong ka LSCC kum ka jingburom ia ka jinglah jong ki ban kyntiew ia ka club sha ka kyrdan 3rd division, ha ryngkat bad ki track suit bad kiwei kiwei de.
Na ka liang u Kongsan Bah Hamlet u la ong ba ka jingjop jong ka Club ka dei nyngkong eh na ka jingshimkhia jong ki nongkitkam jong ka club khlem pyrkhat ia ka por bad ka bor. U ong ruh ba watla ka kynhun ka rem ha ka semi final hynrei ka dei pat ka jingjop ba ki la kiew na ka 4th Division sha ka 3rd Division.
“Phi la wanrah ka burom ia kawei pa kawei ka ïing ha Lummawbah,” ong u Bah Hamlet bad bynrap ruh ba “Ka jingialehkai football mynta kam dei shuh tang ban shu ialehkai myllen hynrei kala dei kawei kaba ai kam ai jam ia pki rangialehkai, kumta la donkam ba ha kane ka arta ba dang 20 snem ba phin trei shitom khnang ba phin poi sha kata ka thong.”
Shuh shuh u Bah Hamlet u la buh ka jingkyrpad ia kine ki rangialehkai ba kin kin iai neh beit bad ka Club bad lada la shem snem ki lah ban pynkiew pat sha ka kyrdan 2nd Division un dang lah ban ai shuh shuh ia ka song pisa kaba kham heh.
Haba kren ha kane ka sngi u President ka Nongkseh Sports Club u Bah Daniel Thangkhiew u la kitbok ia ka club ba kan nang kiew arted na kawei ka division sha kawei pat.
Na ka liang u Bah R Khongwir President ka Club u la ong ba ki sngewkmen haduh katta katta ba da ka jingtrei shitom jong ki khynnah ialehkai ryngkat ki coach ki la lah ban kiew pat sha kawei ka kyrdan.
Katba u Rangbah Shnong ka Lummawbah, Bah E Thangkhiew u la pynpaw ka jingsngewnguh ia ki nongkyrshan jong ka Club bad ruh ki nongkitkam jong ka kiba la pyntyllun ia ka kam na ka por sha ka por.
Ha kane ka sngi ka Club ka la pynkup burom ruh ia ki nongkyrshan borbah kiba la don ka bynta kaba khraw ban tynrong ia ki prokram jong ka club.
 ban pynkiew na ka kyrdan 4th Division sha ka kyrdan 3rd Division ha ka lympung ialehkai jong ka SSA U-20 4th Division, mynta ka sngi ka LSCC kala pynkup burom ia kine ki rangialehkai jong ka club.){kind=link}