Nongpoh, Nailur 18: Ban ai mynsiem shuh shuh ia la ki khynnah pule, ki bor pyniaid ka Friendly Academy Higher Secondary School, Umpyrdong, Umden, kaba la nang jam ruh sha u mawmer ba 20 snem ka jingshakri ban pynphriang ia ka jingnang jingstad, hynne ka sngi Balang, kala pynkup burom ia ki khynnah pule kiba la pass bha ha ka eksam SSLC bad HSSLC ba la dep bad kane ka skul ka la paw ha ka eksam HSSLC na ka jingpass bha haduh 9 ngut.
Ha kane ka prokram la wan ban don ryngkat lang u Bah Mayralborn Syiem u MLA ka Nongpoh kum u kongsan, ha kaba la ia donlang ruh ka Kong S.Shylla Principal, ki nonghikai, khynnah skul bad ki kmie ki kpa.
Haba kren ha ka jingialang, u Bah Mayralborn Syiem ula ai iaka jingiaroh ia kane ka skul ba wat tang haki khyndiat snem, kane ka skul kala lah ban pynmih shibun ki khynnah kiba stad bad kiba shemphang ha kaba bun na ki samla pule kiba la pass na kane ka skul kila ioh ban ia trei ha ki tnad sorkar bapher bapher.
Ula ong ruh, ba kum kawei na ki shlem ai jinghikai ha ka thaiñ Umden, kane ka skul ka lah ban leh ia kaba bha tam na ka bynta ban kyntiew iaka kam pule puthi hapoh kane ka thain wat hapdeng shibun ka jingiakynduh mawsiang bad ki jingtynjuh kaba ki bor pyniaid skul kila hap ban mad ban kyntiew ia ka jingnang jingstad ban pynsahnam ruh ia u “Bah Friendly Manih”, Bam Kwai ha Dwar U Blei, ia uba la pynsahnam lyngba kane ka shlem ai jingnang jingstad.
“Ka jingmih ki khynnah pule kiba pass bha ha ka eksam SSLC bad HSSLC ka long ka jingai jingkyrmen kaba khraw ia ki nongpyniaid jong kane ka skul bad kum ki samla pule kidei ban nang iai treishitom haki jingpule jong ki khnang ba kin nang lah ban kiew shuh shuh sha ki kyrdan kiba kham shalor”, ong u Bah Syiem.
Ha kane ka sngi, u MLA ka Nongpoh ula pynlait iaka ‘Work Order’ kaba T.2 lak na ka SRWP skim 2023-24 sha ka skul ban tei pynbha iaki kamra klas.
