Shillong, Nailur 09 : U Myntri ka Tnad Social Welfare Bah Paul Lyngdoh, ha ka sngi Nyngkong, ula pynksan ia ka jingthung kam ia ka MP barim ka Lok Sabha Agatha K Sangma, kum ka Chairperson ka Meghalaya State Commission for Protection of Child Rights (MSCPCR).
Haba kren sha ki lad pathai khubor, u Bah Paul ula ong “Kine ki jingkynnoh kin mih beit, la ngin thung ia ka A, B lane C. Ka mat ba kongsan hi, kumba nga la iathuh teng sha phi, ngi la dep iakren bad ithuh ia ka briew kaba ngi la phah kyrteng ban long kum ka Chairperson ka Child Rights Commission hynrei Sngewsih, kane ka briew kala kyntait iaka jingtyrwa, kaba la pynslem ia ka jingthung Chairperson”.
U Bah Paul ula batai ba ka kyrteng jong ka Agatha Sangma ka dei kaba la tyrwa ha ka jingialang jong ka Kynhun Myntri ba long myn ha ka sngi Thohdieng bala lah hadien ka jingiakren bad jingbishar kaba sani bha.
“Ngi la bishar bha ia ka jingshemphang jong ka ha Parliament, ka kyrdan pule jong ka bad ka kam shakri jong ka ia u paidbah. Kine kine ki mat kiba kongsan kiba kyrshan ban thung ia ka kum ka Chairperson” ula ong.
Lah ban kdew ba ka Meghalaya State Trinamool Congress (TMC) kala kynthoh jur ia u Myntri Rangbah ka Jylla Conrad K Sangma ha ka sngi U Blei, haba kynnoh ia u ba ula pyndonkam bakla ia ki nongkynti ka Jylla ban myntoi shimet.
Kane ka jingkynthoh kala mih hadien ka jingthung ia ka Agatha Sangma kum ka Chairperson ka MSCPCR namar ba ka dei ka para jong u Myntri Rangbah ka Jylla.
Ka TMC kala dawa ruh ia u Myntri Rangbah ban buh hakhmat ia ka bha ka miat jong ki paidbah ka Jylla hashuwa ki kam shimet.
.){kind=link}