Shillong, Rymphang 24 : U Symbud Myntri Rangbah ba khmih ia ka Tnad Transport Bah Sniawbhalang Dhar ha ka sngi Ba-ar, ula pynksan ia ka jingpynlut ka Tnad ha ka jingshakri ki Consultant, da kaba ong ba la thung ia ki namar ki jingkyllain kiba don ha ka jingwanrah jingkylla ha ka kam kad liengsuin, jingthaw polici bad ka jingpyntrei ia ki jingtei kiba kongsan.
Haba jubab ia ka cut motion, u Bah Sniawha ula pyntip ia ka Iingdorbar Thaw Ain ba ki Consultant kila kyrshan ia ka Meghalaya Aviation Vission-ka jingpynheh ia ka Shillong Airport, ka jingpyntreikam ia ka Baljek Airport bad ka heliport ha Shillong bad Tura.
“Ka kynhun consultant kala pynleit jingmut ha ka jingiatreilang bad ki agency bapher bapher kiba don bynta, kyrshan ha ka jingkhmih bniah ia ki project, bad pynthikna ia ka jingiaid bha ki kam bala pyntrei kat kum ka por bala buh” ula ong.
U bynrap ba kane kajuh ka kynhun kala iarap ban thaw iaka Meghalaya Vehicle Scrappage Policy 2025, ka Motor Cab and Motorcycle Rental Rules, 2025 bad ka Chief Minister’s Regional Transport Scheme 2025.
Ka jingthungkam ia ki ka long na ka bynta 24 bnai naduh ka 1 tarik Lber 2024 haduh ka 28 tarik Rymphang 2026, ha kaba lai ngut ki consultant la thung ba kin trei baroh shisngi.
Ka dor jong ka contract ka long T.3.03 klur, bad ia ka jingsiew la pynlait man la u bnai kat kum ka thup jingpynlut bad jingshakri (invoice) lem bad ka jingiaid ka kam.
